Bir-iki gün bundan öncə redaksiyamıza Sumqayıt şəhəri, H.Z.Tağıyev qəsəbəsi, S.Bəhlulzadə küçəsi, ev-3, mən-46 ünvanında yaşayan Çələbiyev Ənvər Məmmədşah oğlunun, ölkə rəhbəri cənab İlham Əliyevə yazmış olduğu müraciətin bir surəti daxil olub. Adı çəkilən şəxs həmin müraciətində qeyd edir:
“2013-cü ildə həyat yoldaşım onkoloji xəstəliyə düçar oldu və belə bir səbəbdən də, onun əməliyyat olunmasına ehtiyac duyuldu. Son anda məcbur olub üçotaqlı mənzilimi Sumqayıt şəhərində fəaliyyət göstərən “Para Bank”a girovluğa qoydum və bankdan 28 faiz olmaq şərtilə, 36 ay müddətinə kreditə pul götürdüm. Həmin vaxt dollların kursu 0,78 faiz idi və mən “Para Bank”dan kreditə götürdüyüm pulu 0,78 faizlə götürdüm. 2013-cü ildən 2015-ci ilə kimi borcumu vaxtlı-vaxtında ödəmişəm. 2015-ci ildə ölkəmizdə baş verən devolvasiya səbəbindən, dolların qalxması etdiyim ödənişə təsir etdi. O halda “Para Bank”a getdim və faiz nisbəti 1 manat 50 qəpik olmaq şərtilə yenidən müqavilə bağladım. Həmin vaxtlarda belə bir faiz nisbətilə ödənişlərimi həyata keçirsəm də, ölkəmizdə baş verən ikinci devolvasiya səbəbindən müəyyən gecikmələrim oldu. Ona görə də bir neçə dəfə banka getdim və faizlərin dayandırılmasını bank əməkdaşlarından dönə-dönə xahiş etsəm də, onlar mənim xahişimi nəzərə almadılar. Çox keçmədi ki, bank tərəfi məni məhkəməyə verməli oldu.
Cənab Prezident! Mən bu müraciəti Sizə ürəkağrısı ilə yazıram və onu da bildirirəm ki, hal-hazırda həmin mənzildə doqquz nəfərdən ibarət ailə üzvlərimizlə birlikdə ağır durumda yaşayırıq. Ailəmizdə bir neçə nəfər azyaşlı uşaq da var. Mən 43 il Sumqayıt şəhərində fəaliyyət göstərən “Xımkombinat” zavodunda zərərli məhsulların istehsalı ilə məşğul olan sahədə çalışıb həmin mənzili almışam. Hal-hazırda hər ay banka 100 AZN pul ödəsəm də, “Para Bank”ın rəhbərliyi bununla razılaşmır və doqquz nəfərdən ibarət ailəmizi bayıra atmağa çalışırlar. Hal-hazırda ölkəmizdə koronavirusa (COVİD-19) qarşı ciddi mübarizə tədbirləri həyata keçirildiyindən və xüsusi karantin rejimi tətbiq olunduğundan, insanlar bayıra çıxmaları qadağan olunub. Belə bir vaxtda da, bank əməkdaşları doqquz nəfər ailə üzvü olaraq bizdən əl çəkmirlər. Hər kəsə bəllidir ki, Siz bütün çıxışlarınızda, keçirilən müxtəlif məzmunlu tədbirlərdə vəzifə sahibi olan şəxslərə lazımi tapşırıqlarınızı verirsiniz, insanları incitməməyi, onların qayğı və problemləri ilə maraqlanmağı dönə-dönə tapşırırsınız. Biz olduqca imkansız və dolanışıq vəziyyəti ağır olan ailələrdən biriyik.
Ona görə də mən Sizin müdrikliyinzə, insan amilini hər an uca tutmağınıza inanaraq, belə bir müraciətimi yazmaq qərarına gəldim. İnanıram ki, Siz bizim dolanışıq vəziyyətimizin ağırlığını, bir mənzildə doqquz nəfərdən ibarət ailə üzvümüzün birlikdə yaşamağımızı nəzərə alıb, üz-üzə qaldığımız belə bir problemin həllində aidiyyatı qurumlara lazımi tapşırığınızı verəsiniz. Onu da qeyd edim ki, mənim banka cəmi 15 min dollar borcum var idi və həmin borcun 8 min dollarını ödəmişəm. Bu gün banka 7 min dollar borcum olduğu halda, bankın rəhbərliyi məndən 17 min dollar pul tələb edir. Belə olan halda bir vətəndaş olaraq müraciət edirəm ki, bu cür ədalətsizlik, bu cür özbaşınalıq olarmı? Ona görə də, yazıb Sizdən artıq dərəcədə xahiş edirəm ki, bizə lazım olan köməkliyinizi göstərəsiniz. Ümidimiz yalnız Sizə, bir də o, böyük Yaradanadır”.
Bəli, baş verənləri təhlil edib belə bir qənaətə gəlirik ki, əslində “Para Bank” bu cür addımı ilə Çələbiyevlər ailəsinə qarşı bir növ “soyqrım” həyata keçirir. Düşünürük ki, belə bir problemin ictimailəşdirilməsi, yəni Sumqayıt şəhər sakini Ənvər Çələbiyevin cənab İlham Əliyevə açıq şəkildə müraciət edib ölkə rəhbərindən imdad diləməsi, problemin qısa zaman kəsiyində anlaşıqlı həlli ilə nəticələnəcək.
P.S. KİV nümayəndəsi olaraq doqquz nəfərdən ibarət Çələbiyevlər ailəsinin üz-üzə qaldığı belə bir problemin varlığını diqqətdə saxlayacağıq. Odur ki, bizi izləməyi unutmayın.
Gundemxeber.Az
