XalqXəbər.Az

www.XALQXEBER.az » Aktual » Mahmudovun əmisi oğlu yenidən məhkəmə önündə

Mahmudovun əmisi oğlu yenidən məhkəmə önündə

Mahmudovun əmisi oğlu yenidən məhkəmə önündə
28-08-2017, 11:21

Sabiq milli təhlükəsizlik naziri Eldar Mahmudovun əmisi oğlu İlham Mahmudovun barəsindəki hökmdən verilən apellyasiya şikayəti icraata götürülüb.
Vəzifə səalhiyyətlərindən sui-istifadə etməkdə təqsirləndirilən İ.Mahmudov “Azərtürkbank” ASC-nin Bakı filialının müdiri olub.
O, qardaşı Vüqar Mahmudovun həyat yoldaşı Nuranə Mahmudovanın adına hesab açaraq 103 min manat köçürüb. Qardaşı İlqar Mahmudovun adına 10 min dollar, onun həyat yoldaşı Fatma Mahmudovanın adına illik 2 faiz ödənməklə 45 min avroluq hesab açıb. Öz həyat yoldaşı Kəmalə Mahmudovanın hesabına 1100 manat mədaxil edib. İ.Mahmudov bütün hesabları özü idarə edib.
Qardaşı Vüqar Mahmudovun sürücüsü Nicat Məmmədovun xəbəri olmadan onun da adına hesab açaraq Nuranə Mahmudovanın adına köçürülmüş 1 milyon 530 min dolları onun vasitəsilə qanunsuz olaraq çıxarıb. İlham Mahmudov 2015-ci ilin noyabrında məsuliyyətə cəlb edilərək barəsində həbs qətimkan tədbiri seçilib.
Nəsimi rayon Məhkəməsinin hakimi Elman İsayevin hökmü ilə İlham Mahmudov 1 il müddətinə azadlıqdan məhrum edilib, aldığı cəza həbsdə yatdığı müddətlə eyni olduğundan o, məhkəmə zalından azadlığa buraxılıb.
İ.Mahmudov da, ittiham tərəfi də hökmdən narazı qalıblar. Prokurorluq İlham Mahmudova daha ağır cəza verilməsi üçün, İ.Mahmudov isə bəraət almaq üçün hökmdən apellyasiya şikayəti veriblər.
İş Bakı Apellyasiya Məhkəməsinin hakimi Sahibxan Mirzəyevin icraatına verilib.
Qeyd edək ki, yazıda adı keçən Vüqar Mahmudov sabiq nazir E.Mahmudovun köməkçisi olub və İ. Mahmudovun qardaşıdır. İlqar Mahmudov isə Səbail Rayon Polis İdarəsinin rəisi olub.

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.