Ötən həftə AzTV-nin iki əməkdaşının yeni növ koronavirus pandemiyasından vəfat etməsi ölkənin teleməkan ailəsinin kədərinə səbəb oldu. Aprel-may aylarında “kimin tanıdığı şəxs bu virusa yoluxub və ya bu virusdan ölüb” suallarını sosial şəbəkələrdə yağdırmaqla hökumətin gördüyü tədbirləri şübhə altına almaq istəyənlər indi rahatlaya bilərlər. Çünki dövlətin. demək olar ki, bütün strukturlarında, eləcə də teleməkanda XXI əsrin bu bəlasına yoluxanların olduğu barədə məlumatlar yayılmaqdadır. Teleməkanda ilk pandemiya qurbanları olmaq isə AzTV-nin əməkdaşlarının taleyinə yazıldı…
Ölümün kimi harada və necə yaxalayacağı heç kimə bəlli deyil. Atalarımız “ölüm gözlə qaş arasındadır” kəlməsini nahaqdan söyləməyiblər. Lakin çox təəssüf ki, COVID-19 qurbanlarına çevrilmiş AzTV-nin əməkdaşları ilə bağlı suallar açıq qalıb.
Pandemiya ilə mübarizə aparılandan bəri tamaşaçıları evdə qalmağa, amma eyvana çıxıb şou-biznesin “ulduzcuqlarına” qulaq asmağa çağıran, insanlara əllərini necə yumağı, maskanı necə taxmağı, qoruyucu vasitələrdən necə istifadə etməyi öyrətməyə çalışan AzTV nədən öz əməkdaşlarının xəstəxanalarda normal müalicə almalarını təşkil edə bilmədi?
Neçə gündür ictimai-siyasi proqramlar departamentinin rejissoru Samir Nemətzadənin ürək parçalayan səsli mesajı internetdə dolaşır. Sosial şəbəkənin izləyiciləri haqlı olaraq bu sualı verirlər: nəyə görə Səhiyyə Nazirliyi və TƏBİB-lə sıx əlaqələri olan AzTV sədri Rövşən Məmmədov bu cür çətin dönəmdə gənc bir adamı taleyin hökmünə buraxmışdı? Axı çox güman ki, Samir kömək üçün dəfələrlə öz rəhbərliyinə səsli mesajlar göndərib. Kimsə deyə bilər ki, AzTV sədrinin bu durumdan yəqin xəbəri olmayıb. Buna inanmaq qeyri-mümkündür. Çünki Rövşən Məmmədovun sayəsində AzTV çuğulluq idarəsinə dönüb. Hər kəs bir-birinin səsini yazıb sədrə göndərir. Bundan başqa, həmin departamentin rəhbəri Rövşən Məmmədovun özünə çox yaxın saydığı və ona hər bir qərəzli-qərəzsiz məlumatı ötürən Sərvər Bayramovdur. Belə çıxır ki, texnologiyanın inkişaf etdiyi bir vaxtda onların heç biri səsli mesajla haray çəkən əməkdaşlarının durumu ilə qətiyyən maraqlanmayıblar.
AzTV-dəki mənbələr deyirlər ki, koronavirusu telekanala gətirən şəxs operatorlardan biri olub. O, koronavirusdan yoluxan ağır xəstələri çəkən zaman ehtiyatsız hərəkətə yol verib. Bu informasiyanın nə dərəcədə dəqiq olub-olmadığını deyə bilmərik. Amma, tutaq ki, belə hadisə olub. Nəyə görə AzTV rəhbərliyi ehtiyatlı və məsuliyyətli davranmayıb? Axı o cür təhlükəli yerdən qayıdan çəkiliş qrupu işə qayıtmalı deyildi, 14 günlük karantinə göndərilməliydi. Onların çəkdikləri süjeti isə həmkarları hazırlamaları idi. Həmin xəstələrlə təmasda olan həkimlər evlərinə belə getmədiklərini həmin süjetdə dəfələrlə vurğulayırdılar. Bunu anlamaq belə çətin idi, yoxsa “kreativlikləri” belə dərinlikləri hələ fəth edə bilməyib? Bu sualları da biz deyil, sosial media izləyiciləri o boyda tarixə malik olan, amma indi loqosu AZ-a çevrilən TV-nin sədri Rövşən Məmmədova ünvanlayırlar.
Əslində, bu fakt AzTV sədri Rövşən Məmmədovun tutduğu posta layiq olmadığının daha bir göstəricisidir. Amma bir zamanlar “Ədalət qəzeti”nin tərzi ilə desək, çox təəssüf ki, “Azərbaycan Televiziya və Radio Verilişləri” QSC-nin sədri vəzifəsini hələ də bu qurumu yaman günə qoyan Rövşən Məmmədov icra edir.
Bəzi saytlar AzTV-də çalışan insanların kütləvi şəkildə virusa yoluxduqlarını xəbər verir. Amma AzTV-nin mətbuat xidmətinin rəhbəri yalnız 5 nəfər əməkdaşın xəstə olduğunu iddia edir və patronuna haqq qazandırmaq üçün televiziyanın ərazisində dezinfeksiya işlərinin aparıldığı, əməkdaşların maskadan və qoruyucu vasitələrdən istifadə etdikləri, qızdırması olanların içəri buraxılmadıqları kimi bəhanələri sadalayır. Onlar bu cür açıqlamalarla iki əməkdaşları ölənə kimi də çıxış edirdilər. onlar öləndən sonra da cavab tərzlərini heç dəyişməyiblər. Görəsən, heç ötən həftə itirdikləri əməkdaşlarının ruhu qarşısında xəcalət çəkirlərmi?
Yəqin ki, çəkmirlər. Dünyalarını dəyişmiş əməkdaşları barədə hazırladıqları süjetlər bu adamlarda xəcalət hissinin yerli-dibli olmadığını göstərir. Olsaydı, xəstəxanada durumunun necə olduğu ilə maraqlanmadıqları, onun harayına vaxtında yetişmədikləri Samirin haqqında “dogma televiziyamızın dogma adamı” kimi süni və qıcıqlandırıcı kəlmədən istifadə etməzdilər. AzTV sədri hələ dogma bildiyi bir adamı xəstəxanada baxımsız və çarəsiz durumda buraxırsa, görün yad bildiyi əməkdaşlara necə münasibət bəsləyir?
Kino və dublyaj redaksiyasının baş redaktoru, Əməkdar incəsənət xadimi Etibar Babayevin haqqında süjet isə lap “sağlığında kor fatma, öləndə badam gözlüm” zərb-məsəlini xatırlatdı. Sən demə, 52 yaşlı Etibar Babayev ustad sənətkar, peşəkar televiziyaçı, ideyalar müəllifi, AzTV-nin inkişafında böyük xidmətləri olan istedadlı insanmış. O zaman nədən Rövşən Məmmədov sədr müavini olandan qısa müddət sonra ideyalarla qaynayan Etibar Babayevi QSC-nin bədii rəhbəri vəzifəsindən uzaqlaşdırıb, kiçik redaksiyaya baş redaktor göndərmişdi? Deyilənlərə görə, hələ dublyaj redaksiyasını da onun əlindən alıb “kreatv” dəstənin sevimlilərindən birinə vermək istəyirmiş? Yəqin ki, Rövşən Məmmədun kadr “soyqırımı”nın stresslərini yaşayan, amma həyatda zarafatcıl və nikbin insan olan Etibar Babayev haqqında hazırlanan süjeti görsəydi, simasında acı təbəssüm yaranardı…
Nə isə… Həqiqətən sözün bitdiyi yerdir…
Allah hər ikisinə qəni-qəni rəhmət eləsin!
Natiq Səlim //dominant.az// 
