XalqXəbər.Az

www.XALQXEBER.az » İqtisadiyyat » Məsələ benzinin bahalaşmasında deyil, əsl BÖHRAN BURDADIR! - NƏ BAŞ VERİR?

Məsələ benzinin bahalaşmasında deyil, əsl BÖHRAN BURDADIR! - NƏ BAŞ VERİR?

Məsələ benzinin bahalaşmasında deyil, əsl BÖHRAN BURDADIR! - NƏ BAŞ VERİR?
8-01-2021, 09:10

Tarif Şurasının 4 yanvar tarixli iclasında təkcə yanacağın qiymətlərinə baxılmayıb. Şurada daşınmaz əmlakla bağlı tariflər barədə də qərar qəbul edilib və qiymətlər iki dəfə artırılıb.

Belə ki:

– Çoxmənzilli yaşayış binaları üzrə binanın ümumi sahəsinin hər 1 m2 -i 40 qəpik olduğu halda, artımdan sonra 85 qəpik olub.

Qeyri-yaşayış binaları (sahələri) və əmlak kompleksi kimi müəssisələr üzrə:

– sahəsi 100 m2-dək 240 AZN (əvvəl maksimum 120 AZN)

– sahəsi 100 m2-dən 500 m2-dək – max 980 AZN (əvvəl 490 AZN)

Mənzillər üzrə:

– sahəsi 50 m2 -dək (50 m2 daxil) olduqda – 20 AZN (əvvəl 12 AZN)

– sahəsi 50 m2 -dən çox olduqda, hər əlavə 1 m2 üçün 33 qəpik (20 qəpik)

Kənd təsərrüfatı təyinatlı torpaqlar üzrə (sahəsi 5,0 ha-dək olduqda):

– pay torpaqları-ailə kəndli təsərrüfatına məxsus olduğu hallarda maksimum 125 AZN

– kənd təsərrüfatı torpaqları ilə bağlı digər hallarda maksimum 175 AZN

(Əvvəlki tarifdə vahid tarif olub və maksimum qiymət 66 AZN təşkil edib.

Həyətyanı və bağ sahələri üzrə:

– sahəsi 0,12 ha-dək olduqda – 20 AZN (əvvəl 12 AZN)

– sahəsi 0,12 ha-dan çox olduqda, hər əlavə 0,01 ha üçün – 1,7 AZN (əvvəl 1 AZN)

Əmlak Məsələləri Dövlət Komitəsindən (ƏMDK) sorğumuza cavab olaraq bildirildi ki, tarif artımları yüksək deyil. Evlərin özəlləşdirilməsi tariflərinin ikiqat artması isə bu sahədə fəaliyyət göstərən icra hakimiyyəti orqanlarının xidmət keyfiyyətini artıracaq:

“Xidmətlərin keyfiyyətinin artırılması ilk növbədə ərazi yerlərinin maddi-texniki bazalarının möhkəmləndirilməsi, işçilərin əmək haqqlarınn artırılması və onların maddi həvəsləndirilməsi əsasında baş verə bilər ki, yüksək səviyyəli xidmətlər göstərilsin. Tariflər birdəfəlik xərclərdir. Sahibkarlar, vətəndaşlar öz mülklərini sənədləşdirməklə, birdəfəlik xərc çəkməklə həmin əmlak üzərində qanuni hüquqlarının dövlət tərəfindən tanıdılmasına imkan yaradırlar”.

Sualımızı Əmlak Ekspert Mərkəzinin rəhbəri Ramil Osmanlıya da ünvanladıq.

Ekspertin fikrincə, ilkin qeydiyyat zamanı xidmət haqları və tariflərin artırılması zəruri olsa da, təkrar qeydiyyatda, xüsusilə də mənzillərdə qiymətin iki dəfəyə qədər artırılmasına ehtiyac yoxdur. Buna baxmayaraq, onun fikrincə, xidmət haqlarının artımı mənzil bazarında bahalaşmaya səbəb olmayacaq:

“Çoxmənzilli binaların qeydiyyata alınmasına görə 1 kv metr üçün təyin olunan rüsumlar 1 AZN-dən aşağıdır. Təbii ki, bu, qiymətə təsir göstərən səbəb deyil. Eyni zamanda, burda daha çox söhbət invertarlaşma və qeydiyyat zamanı tələb olunan rüsumlardan gedir. Həmin rüsumların artırılması hesab etmirəm ki, əmlak bazarında hər hansı dəyişikliyə gətirib çıxarsın”.

Qeyd edək ki, daşınmaz əmlakın özəlləşdirilməsi tarifləri sonuncu dəfə 2009-cu ildə dəyişdirilib.

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.