“Bu gün Azərbaycan Avropa İttifaqı ölkələri ilə əlaqələrini həm ikitərəfli formatda, həm də müxtəlif beynəlxalq təsisatların tərkibində uğurla genişləndirir, inkişaf etdirir. Ölkəmizin Avropanın enerji təhlükəsizliyi məsələlərində, eləcə də bu qitənin Mərkəzi Asiya, Uzaq Şərq, Cənub-Qərbi Asiya və Çinlə ticarət əlaqələrində getdikcə artan rolu Azərbaycanın beynəlxalq mövqelərinin hər keçən gün daha da möhkəmlənməsinə xidmət edir. Digər tərəfdən isə dünyanın, o cümlədən Avropanın aparıcı gücləri artıq aydın başa düşürlər ki, Cənubi Qafqaz kimi geostrateji baxımdan son dərəcə mühüm regionda təmsil olunmaq, öz maraqlarını təmin etmək şansı almaq üçün ilk növbədə Azərbaycanla hesablaşmaq, ölkəmizin bu xüsusda müsbət rəyini əldə etmək lazımdır. Hazırda Azərbaycanla əməkdaşlıq əlaqələrini davamlı şəkildə inkişaf etdirən ölkələrdən biri də Almaniya Federativ Respublikasıdır. Birmənalı olaraq deyə bilərik ki, cari ilin 01 aprel tarixində Almaniya Prezidenti Frank-Valter Ştaynmayerin Azərbaycana ilk dəfə etdiyi rəsmi səfər də ölkələrimiz arasında əlaqələrin inkişafında yeni, daha dinamik mərhələyə keçid üçün möhkəm zəmin yaradacaq.” Bu sözləri ictimai xadim, politoloq Adəm İsmayıl Bakuvi Almaniya Prezidentinin Azərbaycana ilk rəsmi səfərini şərh edərkən aia.az-a verdiyi açıqlamasında deyib.
Müsahibimiz qeyd edib ki, Azərbaycanın beynəlxalq mövqelərinin getdikcə möhkəmlənməzini təmin edən ən mühüm amil cənab Prezident İlham Əliyevin həyata keçirdiyi müstəqil, praqmatik xarici siyasətdir: “Məlumdur ki, Almaniya tamamilə haqlı olaraq Avropa iqtisadiyyatının əsas aparıcı qüvvəsi, necə deyərlər lokomotivi hesab olunur. Həmçinin Avropa İttifaqının xarici siyasətinin formalaşmasında da bu ölkənin rolu, sözünün çəkisi müstəsna önəm daşıyır. Əlbəttə ki, belə bir ölkənin məhz iqtisadi dəstək müqabilində minnətdarlığını qazanmaq böyük nailiyyətdir. Diqqətəlayiq haldır ki, Almaniya Prezidenti aprelin 2-də Bakıda mətbuata bəynatla etdiyi çıxışında Azərbaycanın hələ 2022-ci ildə onun ölkəsi üçün böyük rol oynadığını xatırladaraq, buna görə bir daha cənab Prezident İlham Əliyevə öz təşəkkürünü bildirdi. Qeyd olundu ki, həmin vaxt Almaniyanın Rusiyadan aldığı qaz təchizatında dayanma baş verdiyi zaman məhz Azərbaycan üzərinə böyük məsuliyyət götürərək Federativ Respublikanın enerji təhlükəsizliyinə mühüm töhfə vermişdi. Bu hadisə bir daha Ölkə Prezidenti cənab İlham Əliyevin uğurla həyata keçirdiyi xarici siyasətin sözün əsil mənasında müstəqil olduğunu nümayiş etdirməklə yanaşı, eyni zamanda da bu siyasətin Azərbaycanın beynəlxalq mövqelərinin möhkəmlənməsində müstəsna rol oynadığını göstərir.”
Fikirlərini davam etdirən politoloq Almaniya şirkətlərinin bundan sonra ölkəmizin bərpaolunan enerji istehsalı ilə bağlı layihələrində daha yaxından iştirak edəcəklərini düşünməyə ciddi əsas olduğunu da vurğulayıb: “Bu gün Azərbaycan özünün böyük bərpaolunan enerji potensialı və zəmində formalaşdırdığı Yaşıl gündəliyi ilə getdikcə daha çox ölkələrin diqqətini cəlb edir. Cənab Prezident İlham Əliyev aprelin 2-də mətbuata verdiyi bəyanatında bu məsələyə də toxunaraq maraqlı açıqlamalar təqdim etdi. İlk növbədə dövlət başçısı bildirdi ki, bu ilin yanvar-fevral aylarında Azərbaycan ilə Almaniya arasında ticarət dövriyyəsi təxminən üç dəfə artıb. Lakin bu əsasən ölkəmizdən ixrac edilən xam neftin həcminin artması hesabına baş verib. Buna görə də növbəti illərdə ticarət dövriyyəsinin şaxələndirilməsi məqsədi ilə konkret tədbirlərin görülməsi nəzərdə tutulur. Təbii ki, bu xüsusda Almaniya ilə Azərbaycan arasında bərpaolunan enerji istehsalı sahəsində əməkdaşlığın genişləndirilməsi çox faydalı ola bilər. Cənab Prezidentin bəyanatında qeyd edildiyi kimi, Almaniya şirkətlərinin bu sahədə çox böyük təcrübəsi, Azərbaycanın isə böyük potensialı və bu potensialı reallaşdırmaq üçün konkret proqramı var. Beləliklə, artıq çox yaxın vaxtlarda Almaniya şirkətlərinin Azərbaycanda bərpaolunan enerji istehsalı sahəsində daha aktiv fəaliyyət göstərəcəklərini gözləmək olar” – deyə, Adəm İsmayıl Bakuvi şərhini başa çatdırıb.
