XalqXəbər.Az

www.XALQXEBER.az » Sosial » Üç piyadanı vuran sürücü həbs olundu

Üç piyadanı vuran sürücü həbs olundu

Üç piyadanı vuran sürücü həbs olundu
25-08-2017, 15:47

Bərdədə 1 piyadanın ölümü, ikisinin xəsarət alması nəticələnən yol qəzasını törətmiş sürücü həbs edilib.

Bu barədə Baş Prokurorluğun mətbuat xidmətindən məlumat verilib.

Məlumatda deyilir ki, avqustun 20-də saat 11 radələrində Bərdə-Tərtər avtomobil yolunun Bərdə rayonu ərazisindən keçən hissəsində Nəriman Nərimanlının idarə etdiyi “VAZ-21154” markalı 90-NN-695 dövlət qeydiyyat nişanlı avtomobillə Malik Əliyevin idarə etdiyi “VAZ-21061” markalı 32-BC-306 dövlət qeydiyyat nişanlı avtomobil toqquşduqdan sonra “VAZ-21154” markalı avtomobil yolun kənarında dayanmış piyadalar Sərvər Məmmədov, Aygün Səmədova və Ağapəri Məmmədovanı vurub.

Yol nəqliyyat hadisəsi nəticəsində A.Məmmədova aldığı xəsarətlərdən hadisə yerində vəfat edib, digər piyadalar isə müxtəlif dərəcəli xəsarətlərlə Bərdə mərkəzi rayon xəstəxanasına yerləşdiriliblər.

Faktla bağlı Daxili İşlər Nazirliyinin Baş İstintaq və Təhqiqat İdarəsində Cinayət Məcəlləsinin 263.2-ci (yol hərəkəti və ya nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb.
Hadisə yerinə baxış keçirilməklə sxem tərtib olunmuş, fotoşəkillər çəkilmiş, məhkəmə tibbi, kompleks məhkəmə-trassoloji və məhkəmə yol-nəqliyyat hadisələri ekspertizası təyin edilmiş, şahidlərin və sürücünün ifadəsi alınıb, hadisənin baş vermə şəraitini özündə əks etdirən videogörüntülər əldə olunaraq cinayət işinə əlavə olunub və digər zəruri istintaq hərəkətləri yerinə yetirilib.

N.Nərimanlı iş üzrə təqsirləndirilən şəxs qismində cəlb edilərək ona Cinayət Məcəlləsinin qeyd edilən maddəsi ilə ittiham elan edilib və barəsində məhkəmənin qərarı ilə həbs qətimkan tədbiri seçilib.

Hazırda cinayət işi üzrə istintaq tədbirləri davam etdirilir.

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.