Mərkəzi Bankın hələ 2012-ci ildə banklar üçün qoyduğu məcmu kapital tələbini yerinə yetirə bilməyən az sayda banklardan biri olan “Bank of Baku”-nun 2018-ci ilin yekunlarına dair maliyyə hesabatı açıqlanıb. “AzPolitika” xəbər verir ki, bankın göstəricilərində bir sıra müsbət tendensiyalar müşahidə olunsa da, əsas pozisiyalar üzrə qənaətbəxş sayılmayacaq məqamlar var.
Bank 2017-ci ildə 35 milyon manatdan artıq ziyan etdiyi halda, ötən ili 3 milyon 473 min manat mənfəətlə başa vurub. Ancaq bu mənfəət mümkün zərərlərin ödənilməsi üçün yaradılan xüsusi ehtiyatların 30 milyon manatdan artığının azad oldunması hesabına yaranıb. Əslində, 2018-ci ildə “Bank of Baku”nun cəmi gəlirləri 44 milyon 655 min manat, cəmi xərcləri isə 71 milyon 462 min manat təşkil edib. Bu o deməkdir ki, bankın xərcləri gəlirlərini kəskin şəkildə üstələyib və 26 milyon 807 min manatlıq əməliyyat zərəri yaranıb. Yalnız mümkün zərərlərin ödənilməsi üçün yaradılan xüsusi ehtiyatların 30 milyon 280 min manatı azad olduğundan əməliyyat zərəri bağlanıb və bunun hesabına bank əlavə 3 milyon 473 min manat xalis mənfəət əldə etmiş olub.
Ötən il bankın faiz gəlirləri 41 milyon 322 min manat olduğu halda, faiz xərcləri 14 milyon 432 min manat təşkil edib. Ancaq əvəzində qeyri-faiz gəlirləri cəmi 3 milyon 333 min manat olduğu halda, qeyri-faiz xərcləri 57 milyon 30 min manat(!) olub. Elə əməliyyat ziyanının yaranmasının əsas səbəbi də həmin qeyri-faiz xərcləridir.
Müqayisə üçün qeyd edək ki, 2017-ci ildə “Bank of Baku”nun cəmi gəlirləri 57 milyon 380 min manat, o cümlədən faiz gəlirləri 55 milyon 912 min manat, qeyri-faiz gəlirləri 1 milyon 468 min manat təşkil etmişdi. Faiz və qeyri-faiz xərcləri çıxıldıqdan sonra bankın 6 milyon 89 min manat əməliyyat mənfəəti qalmışdı. Mümkün zərərlərin ödənilməsi üçün yaradılan xüsusi ehtiyatlara 41 milyon 517 min manat ayırdığından “Bank of Baku” 2017-ci ili 35 milyon 428 min manat zərərlə bağlamışdı. Ancaq ötən il mümkün zərərlərin ödənilməsi üçün yaradılmış ehtiyatların bir hissəsinin azad olması bankın gecikmədə olan kreditlərinin azaldığının göstəricisidir.
Bütün bunlarla yanaşı, “Bank of Baku” ötən il də Mərkəzi Bankın məcmu kapitalın həcmi üçün qoyduğu 50 milyon manat tələbini yerinə yetirə bilməyib. Belə ki, bankın 2018-ci ilin yekunlarına görə məcmu kapitalı cəmi 39 milyon 945 min manat təşkil edib ki, bu da 2017-ci illə müqayisədə təxminən 3 milyon manat çoxdur. Ancaq yenə də bu göstərici Mərkəzi Bankın tələbindən 10 milyon manat azdır.
Xatırladaq ki, 50 milyon manat tələbini yerinə yetirə bilməyən cəmi 4 bank var və onlardan biri də məhz “Bank of Baku”dur. Onu da qeyd edək ki, məsələn, “DəmirBank” məhz məcmu kapital tələbini yerinə yetirə bilmədiyi üçün bankın lisenziyası ləğv edilmişdi.
AzPolitika.info
