Bu gün Bakı Ağır Cinayətlər Məhkəməsində dələduzluqda təqsirləndirilən Emil Hüseynovun cinayət işi üzrə məhkəmə prosesi davam etdirilib.

Hakim Zeynal Ağayevin icraatında olan prosesdə baxış iclası keçirilib.

Şahid qismində ifadə verən Elşad Yusifov deyib ki, Arif Əsgərovun oğlu Elnarın tapşırığı ilə Moskvaya gedib: “Mən Emil Hüseynovla bir yerdə getdim, Elnar müəllim ikimizi də göndərmişdi. Orada Səbuhi adla şəxslə görüşdük, işlə bağlı danışdıq. Səbuhinin Elnara külli miqdarda borcu olduğunu da sonradan bildim”.

Digər şahid Elmar Qasımov deyib ki, qayınatasına 27 min borc pul verib: “Qayınatam Namiq dedi ki, pulu Emil Hüseynova verib, iş gördükdən sonra qaytaracaqdı”.

Məhkəmə prosesi sentyabrın 22-də davam etdiriləcək.

Məlum olub ki, E.Hüseynov Gürcüstandan izolyasiya və digər materiallar gətirmək adı ilə Emil Məmmədovdan 2 milyon 500 min dollar, Tural Hüseynovdan 382 min dollar, Namiq Mehdiyevdən 80 min manat və Mərziyyə Rzayevadan isə 19 500 manat pul alaraq dələduzluq yolu ilə mənimsəyib.

E.Hüseynov istintaq dövründə ev dustaqlığındadır. O, özünü qismən təqsirli bildiyini deyib.

Qeyd edək ki, təqsirləndirilən E.Hüseynov “Azərbaycan Dəmir Yolları” QSC-nin rəisi, sonra isə nəqliyyat nazirinin müavini olmuş Arif Əsgərovun baldızı oğludur.