XalqXəbər.Az

www.XALQXEBER.az » Sosial » "Qaçqınkom” fərdi yaşayış evlərinin təmirinə orta hesabla nə qədər vəsait ayırır,nə qədər silir?

"Qaçqınkom” fərdi yaşayış evlərinin təmirinə orta hesabla nə qədər vəsait ayırır,nə qədər silir?

"Qaçqınkom” fərdi yaşayış evlərinin təmirinə orta hesabla nə qədər vəsait ayırır,nə qədər silir?
27-10-2020, 11:38

Qaçqın və məcburi köçkün ailələrinin problemlərinin həlli daim dövlətimizin başçısı İlham Əliyev cənablarının diqqət mərkəzində olub.Ötən illər ərzində bu sahədə görülən işləri sadalamağa zənnimicə ehtiyac yoxdur.Elə sentyabr ayında məcburi köçkün ailələrinin mənzil-məişət şəraitinin yaxşılaşdırılması məqsədilə Azərbaycan Respublikasının 2020-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinə 42,5 milyon manat ayrılması kifayət edir. Bəs sözügedən Komitə tərəfindən Ermənistan-Azərbaycan Dağlıq Qarabağ münaqişəsi nəticəsində doğma yurdlarını tərk etməyə məcbur olan insanların sosial müdafiəsinin gücləndirilməsi, mənzil-məişət şəraitinin yaxşılaşdırılması, məşğulluğunun artırılması istiqamətində dövlətimizin məqsədyönlü tədbirlərı necə həyata keçirilir?

Aktualinfo.org bu barədə bir müddət əvvəl bu mövzuya toxunmuşdu.Doğma yurdlarını tərk etməyə məcbur olmuş insanların mənzil-məişət şəraitinin yaxşılaşdırılması möbzusuna bir daha qayıtmaqda məqsədimiz burada baş verən narazılıqlardan başqa,yol verilən nöqsanları geniş içtimaiyyətin diqqətinə çatdırmaqdır. Bəri başdan qeyd etmək istərdik ki,Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamentinin sədri Səbuhi Əhmədovun elektron poçtuna ([email protected]) ünvanladığımız sorğu məktubları cavabsız qalır.Çox güman ki,Səbuhi Əhmədov qeyd etdiyimiz elektron poçta aylardır baxmır.Daha sonra Komitənin rəsmi email poçtuna([email protected]) ünvanladığımız və əlaqə saxladığımız mətbuat xidmətinin işçisi də redaksiyamızın sorgusuna cavab vermədi. Odur ki,cavab almaq istədiyimiz bəzi sualları Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayeə və Departament sədri Səbuhi Əhmədova elə buradan vermək istəyirik. Məlum olduğu kimi Qaçqınların və Məcburi Köçkünlərin İşləri üzrə Dövlət Komitəsi tərəfindən köçkün ailələrinin mənzil-məişət şəraitinin yaxşılaşdırılması məqsədilə ilə kifayət qədər vəsait ayrılır.Fərdi yaşayış evlərinin təmiri üçün ayrılan vəsitlər hansı şəkildə həyata keçirilir?Aydın məsələdir tender yolu ilə. Bəs burada təmirə ehtiyacı olan evlərin smetası necə tutulur?Məsələn, bir evin təmiri hazırki bazar qiymətləri ilə nə qəddər vəsait tutur? Fərqi aşağıda göstərməyə çalışacağıq.

Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamentinin 2020-ci ilin yeddi ayı ərzində keçirdiyi tenderlər barədə ötən yazımızda ətraflı məlumat vermişdik. Sözügedən Departamentin bu ilin yeddinci ayından sonra keçirilmiş tenderlərin ətrafında apardığımız araşdırmalar da əvvəlkilərdən heç də fərqlənmir və burada da hər şeyin heç də şəffaf olmadığını bir daha görsənir.

Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti tərəfindən Ağdam rayonunda 13 ədəd fərdi yaşayış evlərinin təmiri üzrə 294162.72 manat dəyərində müqavilə 14.08.2020-ci il tarixdə “Qarabağ Təmir-Tikinti” MMC ilə müqavilə bağlanıb.Burada ayrılmış vəsaitə görə təmir olunacaq evlərin hər birinə orta hesabla 22 627 manat düşür.

Sözügedən Departamenti tərəfindən Ağdam rayonunda 16 ədəd fərdi yaşayış evlərinin təmiri işləri üzrə 295261.75 manat dəyərində müqavilə 16.09.2020-ci il tarixdə “Qarabağ Təmir-Tikinti” MMC ilə bağlanıb.Qeyd edək ki, Departament sözügedın MMC-nin hesabına elə həmin rayonda 13 fərdi yaşayış evinin təmiri işlərinə 294162.72, növbəti tenderdə isə 16 fərdi yaşayış evinin təmiri işlərinə də 295261.75 manat dövlət vəsaiti ayırıb.Burada isə hər bir evin təmirinə orta hesabla birincidə 22 627,ikincidə isə 18 453 manat düşür. Maraqlıdır,13 fərdi yaşayış evinin də,16 fərdi yaşayış evinin də təmirinə 300 min manata yaxın vəsait ayrılıb.Qeyd edək ki,sözügedən MMC təkcə 2020-ci ilin avqust-sentyabr aylarında 5 tenderin qalibi olub ki,onun 3-ü Ağdam rayon İcra hakimiyyətinin elan etdiyi tenderlərdir.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “Qarabağ Təmir-Tikinti” MMC-nin Ağdam Rayon Vergilər Şöbəsində 19.11.2018-ci il tarixdə dövlət qeydiyyatına alındığı göstərilib.Reyestr məlumatlarında nizamnamə kapitalı 10 manat olan MMC-nin hüquqi ünvanı Ağdam rayonu,Quzanlı qəsəbəsi, qanuni təmsilçisinin isə Məmmədov Elgün Yusif oğlu olduğu qeyd edilib.

Sözügedən Departament tərəfindən Bərdə rayonunda və Mingəçevir şəhərində salınmış məcburi köçkün qəsəbələrində binaların fasad üzlük daşları və dam örtüklərinin əsaslı təmiri işləri üzrə 248952.58 manat dəyərində müqavilə 29.08.2020-ci il tarixdə “ABADLIQ-R TTQ” Məhdud Məsuliyyətli Cəmiyyəti ilə bağlanıb.Burada da elan olunmuş tenderdə nə qədər dam örtüyünün dəyişdirilməsi barədə açıq məlumat verilməyib.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “ABADLIQ-R TTQ” MMC-nin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 18.05.2009-cu il tarixdə dövlət qeydiyyatına alındığı göstərilib.Reyestr məlumatlarında nizamnamə kapitalı 10 manat olan MMC-nin hüquqi ünvanı Bakı şəhəri, Sabunçu rayonu, Bakıxanov ştq, Şamil Kamilov ev 7,qanuni təmsilçisinin isə Cəfərov Rza Əli oğlu olduğu qeyd edilib.

Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti tərəfindən Füzuli rayonunda fərdi yaşayış evlərinin və inzibati binaların təmiri işləri üzrə 295805.28 manat dəyərində müqavilə 08.09.2020-ci il tarixdə “TURAN.İ.O” Məhdud Məsuliyyətli Cəmiyyəti ilə bağlanıb. Müqaviləyə görə MMC göstərilən məbləğə 3 ədəd 2 otaqlı,1 ədəd 3 otaqlı fərdi yaşayış evinin və 3 ədəd inzibati binanın təmiri işlərini həyata keçirməlidir.Qeyd edək ki,MMC 26.12.2019-cu il tarixdə Məcburi Köçkünlərin Sosial İnkişaf Fondu tərəfindən keçirilmiş 3163203.01 manat dəyərində tenderin qalibi olub.Bu isə MMC-nin Qaçqınların və Məcburi Köçkünlərin İşləri üzrə Dövlət Komitəsi yüksək vəzifəli şəxslərinə bağlı olduğunu deməyə əsas verir.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “TURAN.İ.O” MMC-nin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 26.11.2018-ci il tarixdə dövlət qeydiyyatına alındığı göstərilib.Reyestr məlumatlarında nizamnamə kapitalı 10 manat olan MMC-nin hüquqi ünvanı BAKI ŞƏHƏRİ YASAMAL RAYONU, YENİ YASAMAL 1, ev 10, m. 46,qanuni təmsilçisinin isə Hüseynov Nicat İldırım oğlu olduğu qeyd edilib.

Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti tərəfindən 18 ədəd fərdi yaşayış evlərinin təmiri işləri üzrə 257435.95 manat dəyərində müqavilə 17.09.2020-ci il tarixdə “NİL-2013” Məhdud Məsuliyyətli Cəmiyyəti ilə bağlanıb.Burada isə vəziyyət bir qədər fərqlidir.Təmir işlərinin harada aparıldığı tender elanında göstərilməsə də orta hesabla bir mənzilin təmirinə 14 301 manat vəsait ayrılıb.Qeyd edək ki, Qaçqınların və Məcburi Köçkünlərin İşləri üzrə Dövlət Komitəsi son bir il ərzində bu MMC-yə ümumi dəyəri 658 340 manat olan 3 dövlət sifarişi verib.Yerində araşdırılsa görəsən bu MMC kosmetik işlərdən başqa təmir işləri aparıbmı?

Kommersiya qurumunun hüquqi şəxslərin dövlət reyestrinə daxil edilmiş məlumatlarında “NİL-2013” MMC-nin 5 saylı Ərazi Vergilər İdarəsində 12.02.2013-cü il tarixdə dövlət qeydiyyatına alındığı göstərilib.Reyestr məlumatlarında nizamnamə kapitalı 30 manat olan MMC-nin hüquqi ünvanı Sabirabad rayonu, Sabirabad şəhəri, Muğan prospekti ev 1, dalan 5,qanuni təmsilçisinin isə Quliyev İlham Sultan oğlu olduğu qeyd edilib.

Sözügedən Departamenti tərəfindən Saatlı rayonunda məcburi köçkünlər üçün salınmış qəsəbələrdə fərdi yaşayış evlərinin təmiri işləri üzrə 293182.1 manat dəyərində müqavilə 23.09.2020-ci il tarixdə “KRAL TƏMİR TİKİNTİ” Məhdud Məsuliyyətli Cəmiyyəti ilə bağlanıb.Burada isə Departament dövlət vəsaitinin neçə fərdi yaşayış evinin təmirinə ayırdığını göstərməməmişdir.Bu MMC isə Məcburi Köçkünlərin Sosial İnkişaf Fondunun və Qubadlı rayon İcra hakimiyyətinin elan etdiyi bir neçə tenderin qalibi olub.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “KRAL TƏMİR TİKİNTİ” MMC-nin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 22.02.2010-cu il tarixdə dövlət qeydiyyatına alındığı göstərilib.Reyestr məlumatlarında nizamnamə kapitalı 10 manat olan MMC-nin hüquqi ünvanı BAKI ŞƏHƏRİ NƏRİMANOV RAYONU, AK.HƏSƏN ƏLİYEV, ev 90, m. 9,qanuni təmsilçisinin isə Qasımov Sərvər Səməd oğlu olduğu qeyd edilib.
Aktualinfo.org

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.