XalqXəbər.Az

www.XALQXEBER.az » Sosial » Ədliyyə polkovnik-leytenantı Şahin Həsənov bizdən pul tələb edir

Ədliyyə polkovnik-leytenantı Şahin Həsənov bizdən pul tələb edir

Ədliyyə polkovnik-leytenantı Şahin Həsənov bizdən pul tələb edir
18-06-2020, 20:51

Koronavirus səbəbindən bütün iş yerləri bağlanıb, əhalidə pul yoxdur, heç yerdən gəlir əldə edə bilmirik. Lakin buna baxmayaraq, 11 saylı Məntəqə Tipli Cəzaçəkmə Müəssisəsinin rəisi, ədliyyə polkovnik-leytenantı Şahin Həsənov bizdən pul tələb edir. Əks halda bizi evə buraxmayacağı, hətta karsa salacağı ilə hədələyir”.

Bu fikirlər XEBER.ORG-a adlarının açıqlanmasını istəməyən Masallı rayonunda yerləşən Ədliyyə Nazirliyi Penitensiar Xidməti 11 saylı Məntəqə Tipli Cəzaçəkmə Müəssisəsində cəza çəkən bir qrup məhkumun adından daxil olan şikayət məktubunda öz əksini tapıb.

Məhkumların sözlərinə görə, müəssisə rəhbərliyi elə şərait yaradıb ki, onlar cəzalarının yüngülləşdirilməsindən peşmançılıq hissi keçirirlər: “Məlumdur ki, cəzaçəkmə müəssisələrində cəzalarını nümunəvi çəkən və müsbət xasiyyətnamə alan məhkumlar rayon məhkəmələrinin qərarı ilə cəzalarının yerdə qalan hissəsini Məntəqə Tipli Cəzaçəkmə Müəssisələrində (MTCM) çəkirlər. Ancaq 11 saylı Məntəqə Tipli Cəzaçəkmə Müəssisəsinin rəisi Şahin Həsənov elə sistem yaradıb ki, nəinki cəzamız yüngülləşib, əksinə, daha da ağırlaşıb. Dərdimizi deməyə də adam tapmırıq. O, bizim hamımızı hədələyir, qanunsuz olaraq rüşvət verməyə təhrik edir. Əvvəlcədən tarixsiz sənədlərə qol çəkdirir, hər hansı problem yarananda yeni tarixlə həmin sənədləri ortaya çıxarır. Sənədləri saxtalaşdırmaqla məhkumları hüquqsuz duruma salır”.

“Müəssisədə hər şeyin öz qiyməti var” deyən məhkumlar bildirir ki, aylıq 130-150 manat müqabilində məhkumlara ailələrin yanına getməyə, hardasa çalışmağa icazə verilir. Halbuki qanunvericilikdə məhkumlara mənzil şəraiti olduqda, cəzaçəkmə müəssisəsi müdiriyyətinin icazəsi ilə müəssisəyə yaxın ərazidə öz ailələri ilə birlikdə yaşamağa, yaşayış yeri əldə etməyə və şəxsi təsərrüfat yaratmağa icazə verilir. Eyni zamanda məhkumlar 1500-2000 manat qeyri-rəsmi ödəniş edilməyə məcbur edilir, bunu etməyənlər isə bütün imtiyazlardan məhrum olunur. Rəhbəri olduğu 11 saylı Məntəqə Tipli Cəzaçəkmə Müəssisəsini paytaxtdan idarə edən Ş.Həsənov ayda cəmi bir neçə gün Masallıda olur. Müəssisədəki işlərini isə müavini Elnur vasitəsilə həyata keçirir.

Məhkumların sözlərinə görə, Şahin Həsənov 11 saylı MTCM-ə rəis təyinatı alana qədər Penitensiar xidmətin 13 saylı cəzaçəkmə müəssisəsinin rəisi, ondan öncə isə 16 saylı cəzaçəkmə müəssisəsi rəisi olub . “Qaniçən rəis” ləqəbi ilə bütün Cəzaçəkmə Müəssisələrində ad çıxaran Ş.Həsənov 16 cəzaçəkmə müəssisəsində rəis olarkən həbs olunmaq təhlükəsi ilə üzləşib. Məhkumlar ona etiraz olaraq aclıq aksiyası keçirib, “bunt”a qalxıblar. Bundan sonra isə onu ucqar Masallıya təhkim edirlər.

Masallıda da analoji fəaliyyətini davam etdirən Ş.Həsənov yüzlərlə məhkumun heysiyyatı ilə oynayaraq, onları intihara sürükləyir. Məhkumlar aiddiyatı qurumların məsələyə qarışmasını, Şahin Həsənovun zülmünə son qoymağı tələb edirlər: “Bizim hər birimiz bir ailənin başçısı, bu vətənin övladıyıq. Törətdiyimiz əmələ görə, cəzamızı da çəkmişik. Məhkumlar da adamdır və bizi təhqir etməyə, aşağılamağa heç kimin ixtiyarı yoxdur. Koronavirus bütün dünyanı bürüyüb, bu vəziyyətdə hardan pul tapaq ki, Şahin Həsənova da ondan verək? Ailələrimiz maddi sıxıntı içərisində olduğu halda kimdən borc alaq ki, Ş.Həsənovun qəzəbinə tuş gəlməyək? İndi elə bir dövrdür ki, adama borc verən də yoxdur”.

Məhkumlar portalımız vasitəsilə Prezident İlham Əliyevə, Birinci vitse-prezident Mehriban Əliyevaya, Ədliyyə naziri Fikrət Məmmədova müraciət edərək, 11 saylı Məntəqə Tipli Cəzaçəkmə Müəssisəsində baş verən qanunsuzluqları aradan qaldırmağa, məhkumları Şahin Həsənovun zülmündən qorumağa səsləyirlər.

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.