"Hazırda banklara dollar almaq üçün müraciət edən vətəndaşlara limitin Mərkəzi Bank tərəfindən sıfırlanmadığı və bu səbəbdən şəxsiyyət vəsiqəsilə dollar alışının mümkün olmadığı bildirilir”.
Sfera.az-ın məlumatına görə, bunu iqtisadçı Natiq Cəfərli deyib. O xatırladıb ki, ötən ilin əvvəlindən başlayaraq Azərbaycanda hər bir vətəndaşa şəxsiyyət vəsiqəsilə 20 min manat ekvivalentində (11 min 750 dollar) xarici valyuta satışı həyata keçirilir.
Ekspertin sözlərinə görə, limiti aşan vətəndaşlara bildirilmişdi ki, 1 il ərzində bu limiti keçənlərə banklar tərəfindən xarici valyuta satışı həyata keçirilməyəcək, limit yalnız 12 ay başa çatdıqdan sonra sıfırlanacaq:
"Qanunsuz və məntiqsiz qadağa qoymaları bir yana, 1 il müddəti bitən vətəndaşların limitini də sıfırlamayıblar. Vətəndaşlar bundan əziyyət çəkir, Elman Rüstəmovun isə heç vecinə deyil. Belə qadağalar, məhdudiyyətlər normal bazar iqtisadiyyatı olan ölkələrdə mümkün deyil. Hətta belə qadağaya cəhd edən ölkə həmən batar - milli valyutası devalvasiyaya uğrayar, investorlar ölkədın qaçar”.
N.Cəfərli deyib ki, bu qərar vətəndaşları yan keçməyə sövq edir: "Yəni, əgər mənim 11.700 dollarlıq limitim dolubsa, qardaşımın, bacımın, qonşumun, dost-tanışımın şəxsiyyət vəsiqəsini götürüb gedib dollar alacam. Bu da mümkün olmasa, qara bazardan alacam. Bu tipli məntiqsiz qərarlar zatən qara bazarı dirçəldir. Belə qərarlarla manatın məzənnəsini saxlamaq cəhdi tam fiaskodur, əksinə, məzənnənin sonra daha sərt oynamasına səbəb olacaq”.
