"AtaBank, ƏmrahBank, NBCbank və AGBank ASC-nin əmanətçiləri olaraq Sizə bu müraciəti yazmaq məcburiyyətində qalmışıq". Bu barədə DİA.AZ-a Elcin Məmmədov adlı əmanətçi tərəfindən göndərilən müracətdə deyilir.
Daha sonra müraciətdə bildirilir: "Belə ki, yuxarıda qeyd olunan banklarda müxtəlif vaxtlarda sığortalı əmanət yerləşdirmik. Bu bankın lisenziyası MB tərəfindən ləğv edildikdən sonra biz öz sığortalanmış əmanətlərimizi aidiyyəti üzrə Azərbaycan Əmanətlərin Sığortalaması Fondu (ADİF) tərəfindən geri qaytarılması ilə bağlı çətinlik çəkirik. İş orasındadır ki, ADİF bildirir ki, həmən banklara müxtəlif vaxtlarda AR Mərkəzi Bankı tərəfindən əmanətlərin qəbuluna qadağa qoyulmuşdur. Lakin nə ADİF-in, nə də əmanətçilərin bundan xəbərləri olmamışdır. Bankların əmanət götürməsi qadağası haqqında məlumat kütləvi informasiya vasitələrində işıqlandırılmamış, bank tərəfindən müştərilər məlumatlandırılmamışdır və vətəndaşlar əmanət yerləşdirməyə davam etmiş, bankla sığortalı əmanət müqavilələri imzalamışdırlar. Sığorta hadisəsi baş verdikdən sonra bu fakt ortaya çıxmışdır və hal hazırda ADİF tərəfindən bu əmanətlər bloklaşdırılıb və qorunmayan əmanətlər kimi nəzərə alınır.
Sadə vətəndaşlar, övladlarımızın gələcəyi üçün və ya mənzil problemini həll etmək üçün işləyib alınımızın təri ilə halal qazandığımız əmək haqqlarımızdan müəyyən məbləğlərdə vəsait toplayıb ölkəmizdəki iqtisadiyyatın stabilliyinə, Mərkəzi Banka, ADİF-ə inanaraq banka əmanət yerləşdirmişik. Bank bizim əmanətləri sığortalayıb ADİF-ə sığorta haqqı ödəmişdir. Lakin buna baxmayaraq biz iki dövlət qurumu (ADİF və Mərkəzi Bank) arasında anlaşılmamazlıq ucbatından əmanətlərimizi qeri ala bilmirik. Vətəndaşların bu yaranmış vəziyyətdə heç bir təqsiri yoxdur. ADİF-ə çox saylı müraciət etməyimizə baxmayaraq hələ də birmənalı cavab ala bilməmişik. Bu çətin COVİD-19 pandemiyası olan dövrdə bizim haqqlarımız pozulur və biz karantin rejimi olduğuna baxmayaraq evlərimizi tərk edib Mərkəzi Bank və ADİF arasında qalmışıq.
Sizdən çox xahiş edirik ki, bu məsələ ilə bağlı bizə köməklik göstərəsiniz və bu məsələni ictimayiləşdirəsiniz".
Mövzu diqqətimizdədir...
