İcbari Sığorta Bürosunun (İSB) rəhbəri Rəşad Əhmədov bütün informasiya texnologiyalarında istifadə edilən proqramları vahid sistemdə birləşdirərək daha yaxşı nəticələr əldə edəcəklərini bəyan etmişdi.

TİA.Az bildirir ki, ictimai təşkilat olmasına baxmayaraq, məxfi şəkildə tender keçirilərək büro tərəfindən müəyyən İT şirkətindən 750 000 və 350 000 manat dəyərində proqram təminatları alınıb.

Lakin qısa zaman keçdikdən sonra proqramın özünü doğrultmadığı, bundan bütün sığorta şirkətlərinin əziyyət çəkdiyi və bununla bağlı büroya saysız şikayətlərin daxil olduğu bəlli olub.

Əlbəttə ki, vəsaitin nə qədərinin real olaraq proqrama verildiyi bəlli deyil. Bundan başqa, bütün şikayətlər Mərkəzi Bankın da dəstəyi ilə ört-basdır edilərək direktorun nüfuzuna xələl gəlməsinə imkan verilmir.

Bu da azmış kimi direktor proqram almaq adı altında müxtəlif şirkətlərlə alqı-satqı müqavilələri bağlayaraq sənəd üzərində satınalmalar həyata keçirib.

Reallıq isə ondan ibarətdir ki, həmin alınan “proqramlar” daxildə əməkdaşların hesabına yazılır və nəticədə Rəşad Əhmədov bu kimi yollarla büronun pullarını mənimsəyib. Bu işdə ona ən böyük dəstəyi sözsüz ki, IT departamentinin direktoru Vüsal Məsiyev verib.