Bakı Apellyasiya Məhkəməsində özünü “FHN polkovniki” kimi təqdim edərək dələduzluq edən “Azərbaycan Dəmir Yolları” QSC-nin Bakı Dəmir Yolu Qovşağı Mülki Müdafiə Qərargahının sabiq rəisi, polkovnik Əlövsət Məhərrəmovun məhkəməsi keçirilib.

Hakim Sahibxan Mirzəyevin icraatında olan prosesdə ilkin baxış iclası keçirilib. Anket məlumatları dəqiqləşdirildikdən iş baxışa verilib.

Proses yanvarın 4-də davam etdiriləcək.

Qeyd edək ki, Ə.Məhərrəmov 90 nəfərdən çox vətəndaşa özünü Fövqəladə Hallar Nazirliyinin (FHN) polkovniki kimi təqdim edərək, onları işə düzəldəcəyi vədini verib. Polkovnik zərərçəkmişlərdən 670 min manat alıb qaytarmayıb. Ağır Cinayətlər Məhkəməsinin hökmü ilə Ə.Məhərrəmov 15 il müddətinə azadlıqdan məhrum edilib.

O, məhkəmədə ifadə verərək aldığı pulları təcridxanada özünü asaraq intihar edən MTN polkovniki İlqar Məmmədova verdiyini deyib.