Türkiyə Yunanıstana Egey dənizindəki mübahisəli adalarla bağlı xəbərdarlıq edib.

Türkiyənin NTV telekanalına istinadən verdiyimiz məlumata görə, Türkiyə xarici işlər naziri Mövlud Çavuşoğlu NATO baş katibi Yens Stoltenberqlə keçirdiyi birgə mətbuat konfransında deyib ki, Egey dənizində Lozanna müqaviləsi ilə hansı ölkəyə aid olduğu müəyyənləşməyən kiçik adalar var.

"Bir müddət əvvəl Kardaq qayalıqları ilə bağlı bir gərginlik oldu, hücum qayıqlarımız toqquşdu. Dünən də bir adaya Yunanıstan bayrağı sancmışdılar, əsgərlərimiz gedib o bayrağı çıxartdılar. Sabah olsa, yenə çıxarılacaq. Belə gərginliyə ehtiyac yoxdur, silahlar işə düşə bilər. Yunanıstanda bir müdafiə naziri var, populizmi sevir. Biz dedik ki, gərginliyə yol açmayaq. Qarşı tərəf Egey dənizində gərginliyə yol açacaq addımlar atmamalıdır”, - deyə o vurğulayıb.