Səudiyyə Ərəbistanı süni zəkaya sahib robota vətəndaşlıq verərək tarixə düşüb.

İnsana ən çox bənzəyən robot olaraq tanınan Sofiyaya paytaxt Riyadda keçirilən “Gələcək İnvestisiya Təşəbbüsü” konfransında vətəndaşlıq təqdim edilib.

Təqdimatda Sofiya da danışıb: “İnsanlarla yaşamaq və işləmək istəyirəm, bu səbəbdən insanları anlamaq və onlarla aramda güvən yarada bilmək üçün duyğularımı ifadə edə bilməliyəm”.

Robotların özlərinin fərqində olub-olmamaları ilə bağlı suala isə Sofiya “Yaxşı, bəs sizdən soruşum, insan olduğunuzu haradan bilirsiniz” cavabını verərək hər kəsi təəccübləndirib.

Robotların dünyanı əllərinə keçirib-keçirməyəcəkləri ilə bağlı suala isə “Elon Musku çox oxuyursunuz, ya da çoxlu Hollivud filmi izləyirsiniz. Narahat olmayın, əgər mənə qarşı yaxşı davransanız, mən də sizə yaxşı davranacağam” cavabını verərək salondakıları güldürə bilib.