ABŞ Prezidenti Donald Tramp ölkənin ən böyük televiziya şəbəkələrindən olan ABC və NBC-yə qarşı sərt bəyanatla çıxış edib. Tramp onları “dünyanın ən qərəzli və ən pis media qurumları” adlandıraraq lisenziyalarının alınmasını tələb edib.
Tramp “Truth Social” hesabında yazıb:
“ABC və NBC FAKE NEWS – dünyanın ən pis və ən qərəzli iki kanalı niyə ildə milyonlarla dollar lisenziya haqqı ödəmir? Onlar Respublikaçılara və Konservativlərə qarşı ədalətsiz işıqlandırmaya görə lisenziyalarını itirməlidirlər. Ən azı, bu qədər dəyərli efirdən istifadə etmək imtiyazı üçün böyük pullar ödəməlidirlər. Saxta ‘jurnalistika’ mükafatlandırılmamalıdır, dayandırılmalıdır!”.
ABC və NBC haqqında arayış
• ABC (American Broadcasting Company) – 1943-cü ildə yaradılıb, hazırda The Walt Disney Company-yə məxsusdur. ABŞ-da tamaşaçı auditoriyasına görə ilk üçlükdədir. Geniş xəbər, əyləncə və idman proqramları ilə tanınır. “ABC News” və “Good Morning America” kimi proqramları ölkədə ən çox izlənənlər sırasındadır.
• NBC (National Broadcasting Company) – 1926-cı ildə qurulub, ABŞ-ın ən qədim televiziya şəbəkələrindən biridir. NBC Universal şirkətinə məxsusdur. “NBC News” və “Today Show” proqramları ilə ABŞ və dünya gündəmini formalaşdıran ən böyük media qurumlarındandır.
Bu iki kanal ABŞ-da ictimai rəyin formalaşmasında həlledici rol oynayan nəhəng media platformaları hesab olunur.
Tramp uzun müddətdir ki, ABŞ mediasının böyük hissəsini “Fake News” adlandırır. Onun fikrincə, liberal yönümlü kanallar Respublikaçılara qarşı kampaniya aparır və bu, seçicilərin şüurunu manipulyasiya edir. ABC və NBC isə tez-tez onun birbaşa hədəfinə çevrilən qurumlardandır.
Ekspertlər bildirirlər ki, Trampın sərt ritorikası ABŞ-da prezident–mətbuat münasibətlərini daha da gərginləşdirir. ABŞ-ın media azadlığı ilə bağlı debatlar qızışır və bu iki televiziya kanalı qarşıdakı dövrdə ciddi siyasi təzyiqlərlə üzləşə bilər.