Ermənilərin Gəncəyə raket atmasından yerli sakinlərin qorxmadığını sadəcə bir cümlə ilə ifadə etmişdi Taryel dayı: “Azərbaycan əhalisi qan görəndə qorxmuyor, “naoborot” qızışıyor”.

Onun “TRT Haber”ə verdiyi bu açıqlama Vətən müharibəsi dövründə qısa müddətdə sosial şəbəkələrdə geniş yayıldı. 

Bir cümləlik açıqlaması ilə məşhurlaşan Taryel Şahverdiyev köhnə döyüşçüdür, Qarabağ qazisidir. 1991-ci ildə könüllü olaraq Qarabağ uğrunda gedən döyüşlərə yollanan Şahverdiyev ayağından və ürək nahiyəsindən güllə yarası alıb. Ürək nahiyəsindən dəyən gülləni çıxarmaq mümkün olmayıb, hələ də bədənindədir...

O güllə çıxmasa da, bu gün gedən döyüşlərdə qazanılan uğurlar Taryel Şahverdiyevin ürəyindən tikan çıxarır.

“Qafqazinfo”nun əməkdaşları həmin ərəfədə Gəncəyə gedərək Taryel Şahverdiyevlə görüşmüşdü. Qarabağ qazisi bildirmişdi ki, bu gün də öz komandası ilə döyüşməyə hazırdır. Ona cəbhəyə yollanmaq üçün bir əmr bəsdir.

2 il əvvəl çəkdiyimiz reportajı bir daha təqdim edirik:

Emin Səfərov

Video-Fotolar: Pərvin Zeynal