G20 ölkələri Əfqanıstanda BMT-nin daimi mövcudluğuna ehtiyac olduğunu bəyan ediblər, bununla da BMT-nin Əfqanıstandakı Yardım Missiyasına dəstək nümayiş olunub.

“RİA Novosti” xəbər verir ki, bu barədə G20 sədrinin Romada yaydığı bəyanatda bildirilir.

“BMT Əfqanıstan böhranının həllində mühüm rol oynayır. Təşkilatın ölkədə daimi mövcudluğunu saxlamaq lazımdır”, - deyə sammitin ümumi məqsəd və prinsiplərini əks etdirən sənəddə qeyd olunur.

“G20 ölkələri UNAMA-nın (BMT-nin Əfqanıstandakı Yardım Missiyası – Red.) Əfqanıstanda mövcudluğunu və onun öz mandatını icra etməsini qəti şəkildə dəstəkləyir, buraya beynəlxalq yardımın əlaqələndirilməsi rolu da daxildir”, - məlumatda belə deyilir.

Bildirilir ki, “Böyük iyirmilik” ölkələri Əfqanıstan rəsmilərini BMT-nin bütün əməkdaşlarının, eləcə də Əfqanıstandakı bütün diplomatik missiyaların və humanitar işçilərin təhlükəsizliyini və hərəkət azadlığını təmin etməyə çağırıb.