Keçən günlərdə məlumat verərək bildirmişdik ki, Qaradağ rayon icra hakimiyyətinin başçısı Süleyman Mikayılovun başı dərddədir. Bu barədə bilgi verən qaynaq iddia edir ki, Mikayılov zatən yaxın günlərdə postunu itirəcək, həm də problem tək bu deyil və başçıya qarşı konkret ittihamlar da var ki, bu da onu həbsə belə apara bilər. Məlumatlı mənbə bildirir ki, Süleyman Mikayılov 4 milyonluq yeyintidə ittiham olunur.
Mənbənin söylədikləri: "Zamanında "Quska"nın (Hazırda vergi cinayətlərinə görə həbs olunmuş Hüseyn Abdullayev nəzərdə tutulur -red.) əsas silahdaşı olan Süleyman Mikayılovun Türkiyədən həbs olunaraq Azərbaycana gətirilən Hüseyn Abdullayevlə hansı əlaqələrinin olub-olmadığı, köhnə mehribançılığın hansı səviyyədə olduğu da araşdırılır. Çünki ortada yetərincə şübhəli məqamlar var və bu barədə yerli KİV-də də haqlı olaraq iddialar səslənib ki, Avropada bəzi mühacirlərin başlatdığı söyüş kampaniyasına Bakıdan dəstək verənlər var. Doğrudur, Süleyman Mikayılob birbaşa olaraq belə bir xəyanətkar siyasətə cəlb oluna bilməz. Amma onun Hüseyn Abdullayevlə sıcaq əlaqələrinin olması faktı imkan yaradır ki, Qaradağın RİH başçısından ən azından araşdırma aparılması üçün şübhələnəsən".
Mənbə iddia edir ki, bütün bu ittiham xarakterli söz-söhbətin fonunda Süleyman Mikayılovun ayağında olan 4 milyonluq yeyinti faktının araşdırılması, onunla bağlı sərt qərarları da gündəmə gətirə bilər: "Bir sözlə, Süleyman Mikayılovun durumu gərgindir. Əgər onun "Quska" ilə hansısa əlaqəsi təsdiqlənərsə, bədəlini ağır formada ödəyəcək".
Xatırladırıq ki, həqiqətən də həm AXC-Müsavat iqtidarı və həm də ulu öndər Heydər Əliyevin hakimiyyətinin ilk illərində Süleyman Mikayılovla Hüseyn Abdullayevin yaxın əlaqələri olub. Və hətta Süleyman Mikayılov "Quskanın adamı" kimi də tanınıb. Belə bir şəraitdə Qaradağın rəhbərinin "Quska"ya sədaqət nümayiş etdirə biləcəyi istisna olunmur.
Əlavə edirik ki, əslində burada daha çox diqqətçəkəni "Quska"nın Süleyman Mikayılovun adını çəkib-çəkməyəcəyidir. Yəni Süleyman Mikayılovun taleyi həm də "Quska"dan asılıdır.
Əlavə bilgilərimiz olacaq. Bizi izləməkdə davam edin. Qarşı tərəfi də dinləməyə hazırıq...
DİA.AZ
