XalqXəbər.Az

XalqXeber.Az » Sosial » İnsanlar vaksinə deyil, Oqtay Şirəliyevə inanmır... - Reallıq budur...

İnsanlar vaksinə deyil, Oqtay Şirəliyevə inanmır... - Reallıq budur...

İnsanlar vaksinə deyil, Oqtay Şirəliyevə inanmır... - Reallıq budur...
19-01-2021, 15:09

Ötən gün Səhiyyə naziri Oqtay Şirəliyevlə TƏBİB sədri Ramin Bayramlıya peyvənd vuruldu. Bunu sübut edən videogörüntülər var, biz də yaydıq. Amma bu şəxslərin, xüsusilə cənab Şirəliyevin peyvənd olunduğuna heç kimi inandıra bilmədik...

Günün mövzusu Səhiyyə nazirinin “tapılması” idi. Onun peyvənd vurdurmaqdan çox üzə çıxması camaatı maraqlandırırdı. Bu münasibətlə bir-birini təbrik edən, gözaydınlığı verənlər də vardı. Axı neçə aylardı gözümüz onu axtarırdı. Nəhayət, axtardığımızı tapdıq...

Bu gün TƏBİB açıqlama yayıb. And-aman edir ki, Oqtay müəllim peyvənd olunub. Hətta qablaşdırmanın üzərində yazılmış “only for clinical trial” sözlərinə də aydınlıq gətirib. Başadüşüləndir. Ölkədə vaksinasiya prosesinə yenicə start verilib. İnamsızlıq aşılamaq olmaz.

Çoxlarının bilərəkdən, ya da bilməyərəkdən üstündən keçdiyi incə bir məqam var: insanlar vaksinə deyil, Oqtay Şirəliyevə inanmırlar. Vaksin bir çox ölkələrdə təcrübədən keçirilib, nəticə müsbətdir. Üstəlik, biz ömrümüzün sonuna kimi pandemiya qorxusuyla yaşaya bilmərik. Nəhayət, bu bəladan qurtulmalıyıq. Hələlik vaksinləşmə yeganə çıxış yoludur. İnanıram ki, yolun sonunda işıq var...

Narahatlıq doğuran əsas məqam odur ki, “siftə” korlandı. Məncə, ilk vaksin xalqın inandığı bir məmura, məsələn, Prezidentin köməkçiis Hikmət Hacıyevə vurulsaydı, nəticə fərqli olacaqdı. Bəlkə də peyvənd olunmaq üçün insanlar indi növbəyə düzüləcəkdi.

Məmur üçün xalqın inamını itirmək böyük faciədir. Məmur xalqdan uzaq düşəndə, insanların deyil, öz arvad-uşağının qayğılarıyla yaşayanda ona inam itir. Məmur xalqın rəğbətini qazanmaq istəyirsə, heç olmasa, ildə bir dəfə onun ürəyindən keçəni etməli, onun eşitmək istədiyini deməlidir.

Taleyran dünyasını dəyişəndə insanların bir-birinə ən çox ünvanladığı sual bu olub: “Bu adamın ölməkdə məqsədi nədir?”

Bəli, sən vəzifədə işlədiyin 20 il ərzində bir dəfə belə xalqın qeydinə qalmadığın üçün hətta müsbət addım atanda da insanlar bir-birindən soruşacaq: “Bu adamın məqsədi nədir?”

Seymur VERDİZADƏ //yenisabah.az//

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.