Cari ilin 6 dekabr tarixində Rusiya Federasiyasının Həştərxan vilayətinin Qubernatoru cənab İqor Babuşkin Azərbaycan xalqının Ümummilli lideri Heydər Əliyevin adını daşıyan, Heydər Əliyev Fondunun təşəbbüsü ilə tam rekonstruksiya olunmuş Həştərxan şəhərindəki 11 saylı məktəbə baş çəkmişdir. Təhsil müəssisəsinin foyesində Azərbaycan xalqının Ümummilli lideri Heydər Əliyevin büstü önünə gül dəstələri qoyulmuşdur. Daha sonra Qubernator məktəblə tanış olmuş, müəllim və şagirdlərlə görüş keçirmişdir.
Sonra cənab İ.Babuşkin 2018-ci ildə istifadəyə verilmiş Azərbaycan İş Mərkəzində olmuş, fəaliyyəti ilə tanış olaraq Mərkəzə baxış keçirmişdir. Baxış zamanı mərkəzin konfrans zalında keçirilən toplantıya qatılaraq Azərbaycan və Həştərxan vilayəti arasındakı dostluq və əməkdaşlıq məsələlərinə dair fikirlərini bildirmişdir.