Şəhid Pəncəlinin qardaşından acı xəbər var. Bir müddət əvvəl sol ayağına ağac düşən aprel şəhidimiz gizir Pəncəli Teymurovun qardaşı Elbrus Teymurovun sol ayağı Təbriz şəhərində amputasiya edilib.
Bu haqda Moderator.az-a danışan şəhidimizin əmisi Şirməmməd Fərəcov qardaşı oğlunun Bakıdakı həkimlərin qurbanı olduğunu bildirib:
“Elbrusu Elmi-Tədqiqat Travmatologiya və Ortopediya İnstitutuna yerləşdirdik. Ayağı gipsə salındı. Altı mindən çox pulumuz çıxdı, amma sonda bildirdilər ki, vəziyyəti yaxşı deyil. Təcili olaraq İrana Təbriz şəhərinə apardıq. Orda həkimlər müayinə etdikdən sonra bildirdilər ki, Bakıda yaxşı müayinə olunmadığından ayaqda çürümə baş verib. Və təcili olaraq sol ayağını amputasiya etdilər”.
Şəhidin əmisi Bakıdakı həkimlərin yalnış diaqnozuna görə məhkəməyə müraciət edəcəyini bildirib:
“Təbrizdən təzə qayıtmışam. Elbrus hələ xəstəxanadadır. Bu işləri yoluna qoyum sonra həkimlərin yalnış diaqnozuna görə məhkəməyə müraciət edəcəm. Bunların Azərbaycanın qəhrəmanının qardaşına qarşı etdikləri budurmu?”
