Bolgexeber.com xəbər saytı keçmiş Kalinin adına zavodun (indiki Sənayə Avtomatika İstehsalat Birliyi) bu günkü vəziyyəti, fəaliyyəti ilə bağlı araşdırma aparıb. Əməkdaşlarımız zavodun yerləşdiyi ərazidə olublar və çox maraqlı mənzərə ilə rastlaşıblar. Araşdırmalarımız nəticəsində məlum olub ki, Əmlak Məsələləri üzrə Dövlət Komitəsinin balansında olan keçmiş Kalinin adına zavodun siması tamamilə dəyişib. Belə ki, zavodun boksları, “qaraj” və istehsalat sahələri çayxanalara kirayəyə verilib. Eyni zamanda zavodun əraziləri “moyka” kimi istifadə olunur. Digər tərəfi isə taxta, dəmir sexinə çevrilib. Qısası, zavod demək olar ki, tamamilə ayrı-ayrı şəxslərə kirayəyə verilib. Maraqlıdır, bu zavodun fəaliyyətini bərpa etməyin mümkünlüyü nə qədər çətin olsa da, onu başdan ayağa çayxanaya, “moyka”ya çevirmək də bir o qədər asan olmamalıdır. Heç şübhəsiz ki, kirayə pullarından əldə olunan vəsait təkcə zavodun formal şəkildə direktor vəzifəsini tutan şəxsin cibinə getmir. Həmçinin zavod direktoru ƏMDK-nin sədri K.Həsənovun razılığı olmadan zavodu çayçılara, ustalara arendaya verə bilməz. Araşdırma nəticəsində onu da öyrəndik ki, adıçəkilən zavod 20 milyon manata özəlləşdirməyə çıxarılıb.