SON DƏQİQƏ
XalqXeber.Az » Müsahibə » Azərbaycanlı teleaparıcı: “Yoldaşım məni görəndə şok oldu” - MÜSAHİBƏ

Azərbaycanlı teleaparıcı: “Yoldaşım məni görəndə şok oldu” - MÜSAHİBƏ

Tarix:

18-09-2017, 10:37

/ 37 204 dəfə oxundu.
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ

Ailem.az-ın bu dəfəki müsahibi tanınmış aparıcı Vüsalə Səiddir.

- Son zamanlar qısa saç kəsiminizlə bir çoxlarının tənqid hədəfinə tuş gəldiniz. Necə oldu birdən-birə stilinizi tamamilə dəyişmək qərarına gəldiniz? Bu addımı diqqət çəkmək, tamaşaçıların yaddaşında qalmaq, yoxsa başqa aparıcılardan seçilmək üçün atdınız?

- Bütün cəmiyyətlərdə axın bir istiqamətə gedir. Amma o axının içərisindən çox az bir hissə onun əksinə çıxır. Və cəmiyyət həmişə o az, fərqli olanla maraqlanır, diqqətini yönəldir. Mən riski, özü də ağılla edilən riski çox sevirəm. Saçlarıma gəlincə, sizə səmimi deyəcəm. Saçım boyadan yanmışdı, daha doğrusu keyfiyyətini tam itirmişdi. Ona görə də qərara gəldim ki, qısaldım. Elə bu ərəfədə də Lider kanalında işə başlamışdım. Lider kanalı tamaşaçılara da yaxşı məlumdur ki, yenilikləri sevir, fərqliliyə üstünlük verir. Beləcə saçlarım yeniləndi və yeni saç şəkli ilə efirə çıxdım. Yeniliyi çox sevirəm, özüm də gördüm ki, bu üslubda bir aparıcı ilk mən oldum. Bir sözlə, ilkə imza atdım.
Əgər insan sırf diqqət çəkmək üçün bir şey edirsə, inanın, o, uğur əvəzinə uğursuzluqla rastlaşacaq. İlk olaraq içdən gələn istəyi reallaşdırmaq lazımdır, ağılla, məntiqlə, sonra əlbəttə ki, diqqət də çəkəcəksən, yaddaşlarda da qalacaqsan. Açığı, bu fərqliliyimin diqqət çəkməsi özüm üçün də maraqlı oldu.

- Həyat yoldaşınızın buna münasibəti necə oldu? Əksər kişilər uzun saçlı qadınları xoşlayır.

- Həyat yoldaşım da televiziyada çalışır və çox müasir bir insandır. Amma hamı kimi, o da yeni saç düzümümü görəndə şok oldu. Atam, anam və qardaşlarım birmənalı şəkildə mənə dəstək oldular. Düzü, həyat yoldaşım da heç kəskin reaksiya vermədi və öyrəşdi.

- Yenidən saçlarınızı uzatmaq istəyərsiniz?

- Bu saç düzümü mənə xoş bir ovqat gətirib. Məni görənlərin əksəriyyətinin reaksiyası çox xoşuma gəlir. Düzdür, elə insanlar var ki, onlara belə saç qəribə gəlir və mən onları da anlayıram. Özüm də bilirəm ki, addımım çoxluğun qəbul edəcəyi bir şey deyil. Qulağım eşidə-eşidə “ölmür e necə, saçına bax”, - deyənlər də var. Gənclər isə çox gözəl qarşılayırlar. “Necə gözəl yaraşır”, - deyərək yanımdan ötürlər. Hətta fotosessiya etmək istəyən bir neçə fotoqrafdan da təklif almışam, jurnallara dəvət edirlər. Bütün bunlar mənə zövq verir.

Yəqin ki, nə vaxtsa, gec, ya tez saçlarmı uzadacağam. Əslində elə saçlarımı kəsdirəndə də məqsədim yenidən uzun, sağlam saçlara sahib olmaq idi. Amma inanın, bu rahatlığı görəndən sonra düşündüm ki, yox, belə yaxşıdır.

- Mükəmməl fiziki quruluşunuz var. Buna necə nail olursunuz, idmanla, yaxud pəhrizlə?

- İdmanla məşğul olmuram, özü də düzünü desəm, az yemək yemirəm, əksinə, çox yeyirəm. Sadəcə çox aktivəm, daim hərəkətdəyəm. Ola bilsin ki, bu hərəkətliliyim belə formada qalmağıma təsir edir. Bir də ola bilsin ki, genetika da burda rol oynayır, yəni bizim ailədə hamımız – ata, ana və qardaşlarım da formadadırlar.

- Dəblə ayaqlaşırsınız?

- Təbii ki, dəbi çox sevirəm. Yenilikləri izləyirəm, axı onsuz olmaz. Amma düşünürəm ki, dəblə yanaşı, gərək insan özünə yaraşanı geyinsin.

- Ən çox dəyər verdiyiniz aksessuar hansıdır?

- Aksessuarlari sevmirəm, ona görə də az istifadə edirəm. Ancaq dəyər verdiyim insanların hədiyyələrinə, yəni aksessuardırsa, hörmətlə yanaşıram və demək olar ki, əzizləyərək özümdə saxlayıram, bəzən də istifadə edirəm.

- Ailəlisiniz, övladınız var, həm baxımlı, həm də işində bacarıqlı bir xanımsınız. Bütün bunlara necə vaxt çatdıra bilirsiniz?

- Çox çətindir, çox. Amma o qədər məsuliyyətliyəm ki, hər şey 100% olsun deyə əlimdən gələn nə varsa edirəm. Çox çətin günlərim olub, amma Allahım həmişə mənə kömək olub, güc verib, tək qoymayıb məni, yolumu açıb və beləcə, hər şeyin öhdəsindən gələ bilmişəm.

- Yoldaşınız hansısa işlərinizdə sizə kömək edir?

- Elə ilk gündən bir-birimizi necə var elə də qəbul etmişik. Bir də onun da işləri çoxdur və mən heç düzü kömək etməsini istəmirəm. Sözsüz ki, desəm, mənə dəstək olacaq, amma daha düzənimizi elə əvvəlcədən belə qurmuşuq.

- Həyat yoldaşınızla necə tanış olmusunuz?

- AzTV-də tanış olmuşuq. İş yoldaşı idik, gündə eyni məkanda olurduq, efirə birgə material hazırlayırdıq və s. Bir də münasibətlərimizə təkan verən dostlarımız oldu və sonda evlilik.

- Bəzən deyirlər ki, evlilik sevgini öldürür. Sizcə, bu doğrudur?

- Sevgi heç bir zaman ölmür, sadəcə forması dəyişir, bir az da adiləşir. Gündəlik qayğılar, problemlər başımızı çox qatır. Və bəzən düşünməyə, sakit nəfəs almağa elə bil vaxt tapmırıq. Sizcə, sevgi olmasa birgə yaşamağı davam etdirmək olar?

- Bildiyimiz qədər bir oğlunuz var. İkinci övlad arzulayırsınız? İstəyərsiniz məsələn, bir qızınız da olsun?

- Mən uşaqları çox sevirəm, amma indiki dövrdə uşaq saxlamaq çox məsuliyyət tələb edir. İnanın, oğluma zorla vaxt ayırıram, qayğısına qalıram, ona görə də düşünürəm ki, hələ ki, yox. Uşağın təminatı yüksək səviyyədə olmalıdır, inşallah, gələcəkdə buna da baxarıq.

- Özünüz avtomobil idarə edirsiniz? Qadınlar daha yaxşı avtomobil idarə edir, yoxsa kişilər?

- Bəli, avtomobil idarə edə bilirəm. Məncə, qadın və ya kişi fərqi yoxdur, avtomobil idarə etməyin məsuliyyəti eynidir. Bu məsələyə qadın-kişi prizmasından yanaşmağı qəbul etmirəm. Sadəcə fərqlilik ondadır ki, qadınların maşına marağı kişilərdən az olur. Baxın, oğlanlar elə uşaqlıqdan maşın sürməyə həvəsli olurlar, qadınlarsa yaşa dolduqdan sonra maraq göstərirlər. Bu zaman təcrübə də özünü göstərir. Amma bir az müqayisə etsək, qadınlar kişilərdən daha məsuliyyətlə yanaşırlar. Bu arada, kişilərdən bir xahişim var. Qadınları sükan arxasında görəndə onlara hörmətlə yanaşsınlar, tərbiyəli və nəzakətli davransınlar.

- Avtomobildən söz düşmüşkən, Türkiyədəki “Ben bilmem, eşim bilir” yarışmasından qazandığınız avtomobili sizə verdilər?

- Avtomobili Bakıya gətirməklə bağlı müəyyən problemlər yaşadıq. Ona görə də, pula üstünlük verməli olduq və sağ olsunlar, ödənilən məbləğı bank hesabına yatırdıq.

- O zaman mətbuatda xəbərlər yayıldı ki, yarışda iştirak etdiyiniz üçün sizi işdən çıxardılar. Bu, doğru idi?

- Xeyr, mən bu Türkiyə məsələsi ilə bağlı heç bir problem yaşamadım. Sadəcə xırda anlaşılmazlıqlar olmuşdu. Mən həmin hadisədən sonra da uzun müddət Azərbaycan televiziyasında çalışdım. İşimə əvvəlki qaydada davam etdim və efirə də çıxdım. Sadəcə kimlərsə mediaya dezinformasiyalar sızdırdılar, məsələ çox ictimailəşdi.
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ
Azərbaycanlı teleaparıcı: “Yoldaşım məni görəndə şok oldu” - MÜSAHİBƏ

Şərhlər

XƏBƏR LENTİ