Litoterapiya alternativ təbabətin inkişafında yeni bir sahə sayılır və onu bəzən XXI əsrin təbabəti də hesab edirlər. Litoterapiya təbii daşların orqanizmə kimyəvi deyil, energetik təsirini öyrənir. Əslində litoterapiya anlayışı geniş mənada daş, metal, lil, gil və mineral sularla müalicəni əhatə edir. Belə hesab edilir ki, daşların vibrasiyası insan orqanizminin vibrasiyasına bərabərdir və orqanizmdə energetik axını optimal formada stimullaşdırır. Daşlarla müalicə ilk dəfə Hindistanda tətbiq edilib. Son illər Fransa, Almaniya və digər ölkələrdə onun öyrənilməsinə böyük maraq göstərirlər.
Daşların magik və müalicəvi təsir xüsusiyyətləri qədim əsrlərdən qaynaqlanır. Demək olar ki, bütün daş minerallarının müalicəvi xüsusiyyəti var. Qədim Yunanıstanda tapılmiş eramizdan əvvələ aid manuskriptdə daşların təsir gücü haqqında məlumatlar var. Qədim Misir papiruslarında da daşların müalicəvi xüsusiyyətləri barədə reseptlər öz əksini tapıb.
Tibet həkimləri tibbi traktatlarda 58 mineraldan hazırlanmış dərmanlardan, qədim ərəb həkimləri isə xəstəliklərin müalicəsində müxtəlif minerallardan istifadə ediblər. Əslində litoterapiyanın tətbiqi Aristotel, Pliniy, Cabir ibn Xəyyam, İbn Sina, Məhəmməd ibn Zəkəriyyə ər-Razi, Əl-Biruni, Paratsels kimi məşhur təbiblərin adı ilə bağlıdır. Məşhur astronom Nikolay Kopernikin sapfir, yəşəm daşı, kəhrəba və digər müalicəvi daşların tozundan hazırladığı müxtəlif yazılı reseptlər Polşadakı Krakov muzeyində saxlanılır.
Qiymətli daşların qan qrupuna uyğun təsnifatına görə, sarımtıl-narıncı rəngdən qırmızı, purpur rəngə qədər olan daşlar I, qırmızı, narıncı, mavi, yaşıl və bənövşəyi rənglərdə olanlar III, mavi və yaşıl rənglərdə olanlar II və IV qan qrupları üçün düşərlidir.