Azərbaycanda 3 məşhur brendin sahibi olan şirkət müflis elan edilir.

Qaynarinfo xəbər verir ki, Bakı şəhəri, Xəzər rayonu, Mərdəkan qəsəbəsi, Rafael Cəfərov 10C ünvanda yerləşən “M.Ş.” Məhdud Məsuliyyətli Cəmiyyətinin (MMC) müflis elan olunması barədə cəmiyyətin təsisçisi tərəfindən qərar qəbul olunub, “cəmiyyətin müflis elan edilməsi və əmlak inzibatçısının təyin edilməsi barədə” iddia ərizəsi ilə məhkəməyə müraciət edilib.

İddia tələbi üzrə hazırlıq iclası 26.01.2021-ci il tarixdə saat 10:00-da keçirilib, mülki iş baxışa təyin edilib. Məhkəmə baxışının iclası 16.02.2021-ci il tarixdə saat 15:00-da Bakı Kommersiya Məhkəməsinin binasında (AZ-1040, Bakı şəhəri, Bakıxanov qəsəbəsi, Oskar Əfəndiyev küçəsi) hakim Fərrux Qasımovun sədrliyi ilə keçiriləcək.

Qeyd edək ki, məşhur “Dalğa”, “Balıqçı” və “Yelkən” brendlərinin sahibi “M.Ş” MMC-dir. Müəssisə balıq istehsalı və satışı ilə məşğuldur. “Dalğa” – ilk milli balıq brendidir. İstehsal ənənəvi üsulla aparılır və məhsullar alman avadanlıqları ilə qablaşdırılır.

“M.Ş.” Tam Ortaqlı Şirkəti 18 sentyabr 2000-ci ildə dövlət qeydiyyatından keçib, 2009-cu ildə MMC statusu alıb. “M.Ş.” MMC-nin nizamnamə kapitalı 1000 manatdır və qanuni təmsilçisi Məlik Məmmədov Rəfail oğludur.

Onu da qeyd edək ki, 2017-ci ildə şirkət 10 milyon manata satışa çıxarılıb.