Ötən həftə Binəqədi rayon Məhkəməsinin hakimi Tağıyev Vüsal Adıgözəl oğlunun çıxardığı qərar əsasında “Sahil – S İnşaat” MTK-nın sahiblərindən biri Pənah Kərimovun ev dustaqlığına buraxılmışdı.

Reportyor.info-ya verilən məlumata görə, Baş Prokurorluğun protesti əsasında dələduzluğa yol vermiş Pənah Kərimov yenidən həbs olunub.

Paytaxtın Yeni Günəşli qəsəbəsində tikilən binada bir mənzili bir neçə nəfərə satmaqla dələduzluğa yol verənlərdən biri olan Pənah Kərimovun ev dustaqlığına buraxılması etirazla qarşılanmışdı.

Tikinti fırıldaqçılarını qurbanı olan sakinlər Baş Prokuror Kamran Əliyevə və Ədliyyə naziri Fikrət Məmmədova müraciətdə hakimin çıxardığı qərarın qanunsuz olduğunu bildirmişdilər.

Bunun ardınca Baş Prokurorluq şirkətin vəzifəli şəxslərindən olan Pənah Kərimovla bağlı çıxarılmış qərardan etiraz verdi və nəticədə vətəndaşların pulunu mənimsəyən, özlərini küçələrdə qoyan saxtakar barəsində həbs qərarı qüvvəyə mindi.

Təbii ki, bu da aldadılmış sakinlər tərəfindən təqdirlə qarşılandı və Baş Prokurorluğun belə operativ reaksiya bildirməsi müsbət addım kimi dəyərləndirilməkdədir.
Hakim Vüsal Tağıyev haqqı pozulan, ev-eşiksiz qalan, pulu yeyilənləri deyil, dələduzu müdafiə etmişi, azadlığa buraxmışdı. Bu da həm də Ədliyyə Nazirliyinə hüquq-məhkəmə sistemi adına ləkə gətirən hal idi.

Odur ki, “Sahil – s İnşaat” MTK-nın sahiblərindən biri olan Pənah Kərimovun ev dustaqlığına buraxılması qərarı ləğv olundu və həbsə göndərildi. Bu qərarı çıxaran hakimə də 165 ailə minnətdardır.

Sakinlərin sözlərinə görə, bundan sonra məhkəmə araşdırması dürüst aparılmalı, həm Pənah Kərimov, həm də onunla birlikdə həbs edilən şirkətin əsas sahibi Taley Alaverdiyev haqqında hökm çıxarılmalıdır. Onlar dələduzluğa yol vermiş şəxslərin cəzalandırılmasını xahiş edirlər. Son qərar da insanlarda ümid yaradıb ki,məhkəmə orqanları bu işə laüeyd yanaşmayacaqlar.


Reportyor.info

XalqXeber.Az