Roma Papası Fransisk Vatikanda İtaliya Ailə Assosiasiyaları Forumunun açılışında çıxış edərkən bildirib ki, İtaliyada doğum nisbətinin azalması narahatedicidir və italyan ailələrinə kömək edən qruplar daha çox iş görməlidir.
Xalqxeber.az Oxu.az-a istinadən xəbər verir ki, “Biz şiddətli demoqrafik qışda yaşayırıq və buna bütün gücümüzlə, işimizlə, ideyalarımızla cavab verməliyik”, - pontifik vurğulayıb.
“Katibim ötən gün mənə dedi ki, Müqəddəs Pyotr meydanında gəzərkən uşaq arabası olan qadın görüb və ona yaxınlaşarakən arabanın içərisində küçüyün olduğunu aşkar edib. Bu, simvolikdir. Ona görə sizə deyirəm. Bizə uşaqlar lazımdır”, - o əlavə edib.
Papanın sözlərinə görə, ailə xidmətləri dövlət siyasəti üçün lobbiçilik edərkən hər hansı xüsusi ideologiyaya deyil, kilsənin doktrinasına və sosial praktikasına əsaslanmalıdır.
Xatırladaq ki, aprel ayında İtaliya statistika idarəsi ölkədə doğum səviyyəsinin rekord aşağı həddə çatdığını, hər 12 ölümə 7 doğuşun düşdüyünü, hətta miqrasiyanın əhalinin azalmasını kompensasiya etmədiyini bildirib. Həmçinin qeyd olunub ki, 2006-cı il doğumların ölümlərdən xeyli çox olduğu son il olub.