"WhatsApp" yenidən məhkəməlik olub.
Dünyada ən çox istifadəçisi olan ani mesajlaşma xidmətinə qarşı iddia qaldırılıb.
İddiaya görə, milyonlarla insanın istifadə etdiyi xidmət itifadəçilərinin şəxsi məlumatlarını - telefon nömrələrini qanunsuz olaraq "Facebook"da paylaşıb. Bunun üçün şirkət Almaniya İstehlakçıları Qoruma Birliyi tərəfindən məhkəməyə verilib.
Qeyd edək ki, "WhatsApp" özü ötən il istifadəçilərin nömrələrinin "Facebook" ilə birləşdirəcəyini ictimaiyyətə açıqlamışdı.
Birliyin məlumatına görə, "WhatsApp" ötən avqust ayında istifadəçi və məlumatları qoruma maddələrini yeniləyib. Yenilənən maddələrlə isə qanunları pozub. Qurum "WhatsApp"ın bu şəxsi məlumatları istifadəçinin "Facebook" hesabı olub-olmamasına baxmadan paylaşdığını əsas gətirib və istifadəçi haqlarını qorumaq üçün iddia qaldırdıqlarını bildirib. "Hər bir istifadəçi öz şəxsi məlumatlarını istədiyi kimi istifadə etməsinə özü qərar verməlidir", - deyə iddianamədə qeyd edilib.
Bu "WhatsApp"ın şəxsi məlumatlarla bağlı qarşılaşdığı ilk problem deyil. Daha öncə də Avropa Birliyi "WhatsApp"la bağlı xəbərdarlıq edib.
Təlimatda "Whatsapp"ın istifadəçi məlumatlarının paylaşılması ilə bağlı ciddi narahatlıq yaratdığı ifadə edilib. Qeyd edilir ki, "WhatsApp"a üzv olarkən qəbul edilən istifadə qaydaları və gizlilik siyasətində boşluq var. İstifadəçilər bu sistemə qoşularkən şəxsi nömrələrin yayılmasına razı olmaları barədə razılıq verməyiblər.
Avropa Birliyi adıçəkilən şirkətdən bu məsələ ilə bağlı məlumat verilməsini istəyib. AB-nin şəxsi məlumatları qoruma qurumları gərəkli qanuni proseslər yerinə yetirilməsindən əmin olana qədər "Whatsapp"dan "Facebook" ilə istifadəçilərin mobil telefon nömrələrini paylaşmamasını istəyib.
