Azərbaycan Memarlıq və İnşaat Universiteti, Azərbaycan Dövlət Mədəniyyət və İncəsənət Universiteti və Azərbaycan İdman Akademiyasının beynəlxalq proqram akkreditasiyası qiymətləndirilməsindən keçmiş ixtisasları üzrə nəticələri Akkreditasiya Şurası tərəfindən tanınıb.
Tu barədə Təhsildə Keyfiyyət Təminatı Agentliyi məlumat yayıb.
Qeyd edilib ki, Azərbaycan Memarlıq və İnşaat Universitetinin bakalavriat səviyyəsində “İnşaat mühəndisliyi” və “Nəqliyyat tikintisi mühəndisliyi” ixtisasları, magistratura səviyyəsində “İnşaat mühəndisliyi” ixtisası, Azərbaycan Dövlət Mədəniyyət və İncəsənət Universitetinin bakalavriat səviyyəsində “Operator sənəti”, “Aktyor sənəti” və “Teatrşünaslıq” ixtisasları üzrə aparılmış beynəlxalq proqram akkreditasiya qiymətləndirilməsi nəticələrinin dövlət akkreditasiyası tərəfindən nəzərə alınmasına dair qərar qəbul edilib.
Həmçinin bu sıraya Azərbaycan İdman Akademiyasının bakalavriat səviyyəsində “İdman menecmenti və kommunikasiya” ixtisası, magistratura səviyyəsində “İdman tibbi və reabilitasiya” və “İdman menecmenti” ixtisasları daxil edilib.