SON DƏQİQƏ
XalqXeber.Az » Sosial » "Tikinti şirkətləri üçün bağlanan “QARA YOL”: - “İnşaat materiallarının bahalaşması səbəbindən...”

"Tikinti şirkətləri üçün bağlanan “QARA YOL”: - “İnşaat materiallarının bahalaşması səbəbindən...”

Tarix:

13-04-2021, 16:17

/ 699 dəfə oxundu.
"Tikinti şirkətləri üçün bağlanan “QARA YOL”: - “İnşaat materiallarının bahalaşması səbəbindən...”

"İşğaldan azad olunmuş ərazilərdə kütləvi tikinti işlərinin aparılması bəzi inşaat materiallarına tələbatı artırıb”.

Bu sözləri Azərbaycanda bəzi tikinti materiallarının qiymətində müşahidə olunan artımın səbəblərini dəyərləndirən Azərbaycanın Rieltorlar Birliyinin sədri Elnur Azadov Yenicag.az-a açıqlamasında deyib.

Onun sözlərinə görə, tikinti materiallarının qiymətində qeydə alınan artım tələbatın artması ilə əlaqədardır:

“Mülki tikinti sahəsində 2020-ci ildə tətbiq olunan yeni vergi qaydalarına uyğun olaraq, tikinti şirkətləri bütün xərcləri yalnız gəlir şəklində ödəməlidirlər. Nəticədə mənfəətdən 18 faiz əlavə dəyər vergisi (ƏDV) verilməlidir.

Bu baxımdan, tikinti şirkətləri artıq qara bazardan “qara yol”la inşaat materialları almağa çalışmırlar. Yəni materialların alışını rəsmi şəkildə həyata keçirməyə məcburdurlar. İnşaat materiallarının satışı və tədarükü ilə məşğul olan şirkətlər isə leqal fəaliyyət göstərəndə, əlavə xərcləri yaranır.

Ona görə də tikinti materiallarının qiymətində artım müşahidə olunur. Digər tərəfdən, artıq işğaldan azad olunmuş ərazilərdə kütləvi tikinti işlərinin aparılması bəzi inşaat materiallarına tələbatı artırıb. Bu amil də qiymət artımına təsir edir”.

Tikinti materiallarının qiymət artımının daşınmaz əmlak satışına mümkün təsirlərinə də toxunan Elnur Azadov bildirib ki, indiki bahalaşma ciddi təsirlərə malik olmayacaq:

“Əslində, maya dəyərinə nə dərəcədə təsir etməsindən asılıdır. 2005-2006-cı illərdə Bakıda kütləvi inşaat işləri həyata keçirilirdi. Bu ərəfədə armaturun qiyməti 600-900 manat civarında dəyişirdi. Ona görə də tikinti şirkətləri evlərin qiymətini 10-15 faiz artırdılar.

Lakin hazırda müşahidə olunan qiymət artımı o qədər də yüksək deyil. Artım, əsasən, bu sahədə vergilərin və yeni inşaat normativlərinin tətbiqi ilə bağlıdır. Tikinti şirkətləri artıq yeni başladıqları layihələrdə qiymətləri 12-17 faizlik artımla təklif edirlər.

Tikinti materiallarının indiki azhəcmli artımı normaldır. Belə hallarda bazar qiyməti tənzimləyir və tikinti şirkətləri daşınmaz əmlakın qiymətini qaldırmırlar”.


Şərhlər

XƏBƏR LENTİ