Ölkəyə gətirilən toxumluq kartof məhsulları 10 gündür ki, Dövlət Gömrük Komitəsi tərəfindən sahiblərinə verilmir. Reportyor.info xəbər verir ki, məlumatı hüquqşünas Təyyar Zülfüqarov “facebook” hesabında yazıb. Bu xəbəri təsdiqləyən fakt isə elə sosial şəbəkədə yayılan bir video materialdır. Füzuli Quliyev tərəfindən yayımlanan videodan görünür ki, gömrük rütbəlisi iş adamının kartof məhsullarını buraxmır. Gömrük əməkdaşı sahibkara bunun səbəbini heç nə ilə izah edə bilmir. Belə aydın olur ki, gömrükdə kartof monopoliyası da var. DGK sədri Səfər Mehdiyev monopoliya olmadığını bildirib. Onun sözlərinə görə, gömrükdə rüşvət və inhisarçılıq yoxdur. Əgər olarsa, istefa verməyə hazırdır. Bir neçə gün qabaq isə prezident İlham Əliyev yeni iqtisadiyyat naziri təyin etdiyi Mikayıl Cabbarovu qəbul edərkən bəyan edib ki, sahibkarlara uzanan o çirkli əllər gərək kəsilsin.
