İş adamının bankdan götürdüyü kredit onun məhkəməyə verilməsi ilə nəticələnib. Dərman preparatlarının idxalı və topdan, pərakəndə satışı ilə məşğul olan “Unimed Farm” Məhmud Məsuliyyətli Cəmiyyətinin direktoru Dünyamalı İmaməliyev və ailə üzvləri “AccesBank” tərəfindən məhkəməyə verilib.

Belə ki, ailə özlərinə məxsus şirkətin adına bankdan külli miqdarda kredit götürüblər. Daha sonra isə ödənişlərdə problem yaranıb. “AccesBank” Xətai rayon Məhkəməsinə müraciət edərək kredit müqaviləsi üzrə borcun tutulması və borc tələbinin ipoteka predmetinə yönəldilməsini tələb edib.

İş üzrə “Unimed Farm” MMC-nin direktoru Dünyamalı İmaməliyev, onun oğlu İlham İmaməliyev, Sona İmaməliyeva, qızları Ləman, Türkan, Maral İmaməliyevalar və Heydər Cəfərov cavabdeh kimi prosesə cəlb olunub.
Rayon məhkəməsi bankın iddiasını qismən təmin edib. Cavabdeh H.Cəfərov və bank bu qərardan narazı qalaraq apellyasiya şikayəti verib.

Hazırda işə Bakı Apellyasiya Məhkəməsinin hakimi Raqib Qurbanovun sədrliyi ilə baxılır. Sonuncu iclasda işlə bağlı ekspertiza təyin edilib. Proses ekpertin rəyi bəlli olanadək təxirə salınıb.

Qeyd edək ki, D.İmaməliyev Bütöv Azərbaycan Xalq Cəbhəsi Partiyasının sədr müavini olub və 2015-ci ildə 17 saylı Yasamal III Seçki Dairəsindən deputatlığa namizəd kimi çıxıb edib. O, həmçinin “VİMAY MEDİKAL” klinikasının baş həkimi işləyib. Rəhbəri olduğu “Unimed Farm” şirkəti 2016-cı ildə vergi borcunu uzun müddət ödəmədiyi üçün D.İmaməliyevin ölkədən çıxışına qadağa qoyulmuşdu.