Bakıda fəaliyyət göstərən çimərliklərdən birində vətəndaşlarmədəni formada "qarət edilir”.
Bu barədə Vüqar Əliyarov adlı sosial şəbəkə istifadəçisi məlumat verib. O, Bilgəhdə yerləşən məşhur "Bilgah Beach Hotel”dən (keçmiş adı "Jumeirah” – red.” şikayət edib. V. Əliyarov istirahət mərkəzindəki qiymətlərdən və yüksək qiymət qarşılığında çox aşağı xidmətdən narazılığını ifadə edib:
"Ora getməklə həyatımın səhvini elədim. Əvvəlcə qeydiyyatda düz 35 dəqiqə gözlədik. Cəmi 1 əməkdaş xidmət göstərir, özü oturub kondisionerli otaqda, camaat koridorda "dönər” olub. Daha sonra adambaşı 35 AZN istədilər. Yazıblar ki, 3 yaşa qədər uşaqlar ödənişsizdir, 12 yaşa qədər isə 20 AZN. Mənim oğlumun 11 yaşı var. Qeydiyyatda mənə deyirlər ki, bu uşağa da 35 manat ödəməlisiniz. Əgər boyu 1,20 m-dən çoxdursa, qiymət də belə edir. Bu nə absurd qaydalardır. Uşağa deyək ki, 12 yaşa kimi boy atmasın?”
Əsas məsələ isə ailə dənizə getmək üçün turniketə yaxınlaşanda olub: "Dostumla dənizə gedəndə kartı vurduq, turniketdən keçmədi. Bu da növbəti absurd qayda. Deyirlər ki, dənizə getmək üçün ayrıca ödəniş edilməlidir. Yəni dənizdə 1 saat üzmək üçün 3 nəfərə ayrıca 105 manat ödəniş etməliyik. Bu nə dərəbəylikdir? Mövsüm başlamamış bu çimərlik və oteli qara siyahıya saldım.
Hələ yemək-içməkdən xəbərimiz olmadı. Deyirlər, orda qiymətlər ümumiyyətlə yaxın durulası deyil”.
