XalqXəbər.Az

www.XALQXEBER.az » Sosial » Bağça müdiri məhkəmədə rüşvət aldığını etiraf etdi

Bağça müdiri məhkəmədə rüşvət aldığını etiraf etdi

Bağça müdiri məhkəmədə rüşvət aldığını etiraf etdi
27-10-2017, 15:39

Bu gün Bakı Ağır Cinayətlər məhkəməsində rüşvət almaqda təqsirləndirilən "Körpə İncilər" Təlim-Tədris Mərkəzinin müdiri İlahə Ziyadovanın cinayət işi üzrə məhkəmə prosesi davam etdirilib.

Hakim Mahmud Ağalarovun sədrliyi ilə keçirilən prosesdə İ. Ziyadova sərbəst ifadə verib.

İ.Ziyadova ifadəsində işə düzəltmə adı ilə rüşvət aldığını etiraf edib. O, zərərçəkmişlərə dəyən ziyanın hamısını ödəyəcəyini bildirib.

Proses noyabrın 2-dək təxirə salınıb.

İttihama görə, Bakının Xətai rayonunda yerləşən "Körpə incilər" Təlim-Tədris Mərkəzinin müdiri İlahə Ziyadova sosial şəbəkələrdə elan edilən vakansiya ilə bağlı ona müraciət etmiş Muradlı Tavat Hüseyn qızını bağçaya ingilis dili müəlliməsi kimi işə qəbulu üçün onun anası Tünzalə Muradovadan 2500 manat məbləğində pul alıb, lakin vədinə əməl etməyib.

Bundan başqa, o, çoxsaylı şəxsləri bağçaya tibb bacısı və müəllimə kimi işə götürəcəyini vəd edərək, onlardan rüşvət alıb.

İ.Ziyadova barəsində polisin nəzarətinə verilmə qətimkan tədbiri seçilib.

Ona qarşı Cinayət Məcəlləsinin 311.3.2 (rüşvət alma, yəni vəzifəli şəxsin xidməti vəzifəsinin (səlahiyyətlərinin) icrası ilə əlaqədar hər hansı hərəkətə (hərəkətsizliyə) görə, eləcə də xidmət üzrə ümumi himayədarlıq və ya laqeydlik müqabilində özü və yaxud üçüncü şəxslər üçün birbaşa və ya dolayı yolla, şəxsən və ya vasitəçidən istifadə etməklə maddi və sair neməti, imtiyazı və ya güzəşti istəməsi və ya alması təkrar törədildikdə) və 162-1.1 (Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən xeyli sayda işçilərin hər hansı işlərin (xidmətlərin) yerinə yetirilməsinə cəlb edilməsi) maddələri ilə cinayət işi açılıb.

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.