XalqXəbər.Az

www.XALQXEBER.az » Bölgə » Tovuzda dövlətin pulu belə havaya sovrulub - Atəşfəşanlıq, bir paket yardım

Tovuzda dövlətin pulu belə havaya sovrulub - Atəşfəşanlıq, bir paket yardım

Tovuzda dövlətin pulu belə havaya sovrulub - Atəşfəşanlıq, bir paket yardım
24-02-2020, 16:26

Dövlət başçısının siyasi iradəsi ilə başlanan islahat dalğası Tovuz rayonundan da yan keçmədi: 07 iyun 2018-ci ildə cənab prezidentin müvafiq sərəncamı ilə Məmmədov Məmməd Cahangir oğlu Tovuz Rayon İcra hakimiyyətinin başçısı təyin olundu. Bu təyinatı keçmiş icra başçısından narazı tovuzlular sevinclə qarşıladılar. Çox keçmədi ki,...

Yeni icra başçısına bəslənən və puç olan ümüdlər

Artıq Məmməd Məmmədovun Tovuz Rayon İcra Hakimiyyətinin başçısı postuna təyinatından iki ilə yaxın vaxt ötür. Bu müddət isə bir icra başçısının fəaliyyətini dəyərləndirmək baxımından kifayət edəcək zaman kəsiyidir...
Tovuz rayonundan yenixeber.org-a daxil olan məlumatlardan və google üzərindən apardığımız araşdırmalarla belə məlum olur ki, Məmməd Məmmədovun fəaliyyəti ilə bağlı yumşaq desək birmənalı danışıb, yazmaq mümkünsüzdür.
Məmməd Məmmədovla bağlı ictimailəşən ilkin narazılıqlar onun kadr təyinatından doğdu. Mediada yer alan iddialara görə, "İcra Hakimiyyəti Aparatına baş mütəxəssis vəzifəsinə “Aptek Sahib” ləqəbli ilə tanınan Əsgərov Sahib Cahangir oğlunun təyinatı səbəbindən, bu gün Tovuzda “feodal təfəkkürü”nə malik idarəçilik, yeni yazılmamış qayda-qanunlar hökm sürməkdədir. Belə ki, bu şəxsin sahibkarları, fermerləri, iş adamlarını, sadə insanları və s. pis vəziyyətə salması da dilə gətirilir və mövzu ancaq “Aptek Sahibin” atdığı addımlarla bağlı olur".(deryaz.az)
“Aptek Sahib”dən narazılıqlar isə təbii olaraq rayon icra başçısının adı ilə bağlanır... Bundan başqa Məmməd Məmmədovun bu müddətdə gözlənilən abadlıq işlərinə, rayonda kütləvi olaraq işsizliyi aradan qaldıra biləcək istehsalat və kommersiya obyektlərinin işə salınmasına və s. imza ata bilməməsi də ümüdləri doğrultmaması kimi qəbul olunur.

Məmməd Məmmədovsayağı bədxərclik
Dövlət vəsaitinin müxtəlif adlarla, dövlət satınalamalarının xətti ilə xərclənməsində problemlərin varlığı acı bir həqiqət kimi hələ də var olmaqdadır. Bəzən büdcə təşkilatları, xüsusi ilə də Rayon İcra Hakimiyyətləri milyonlarla büdcə vəsaitini ata malı kimi pay-püş edirlər.
Problemin aktuallığı səbəbindəndir ki, ötən ilin son aylarında cənab prezident də iqtisadi müşavirədə bu mövzuda narahatlığını bildirdi. Sitat: "...Beləliklə, əminəm ki, biz eyni həcmdə olan işi az vəsaitlə icra edə bilərik. Buna nail olmaq üçün, ilk növbədə, şəffaflıq, dövlət nəzarəti və ictimai nəzarət olmalıdır. Bütün dövlət qurumlarına deyirəm, yoxsa onlar pis öyrəşiblər. Hər ilin sonunda büdcə müzakirə olunarkən, sifarişlər göndərirlər. Özü də orada şişirdilmiş rəqəmlər öz əksini tapır, havadan götürülmüş rəqəmlər. Onlardan soruşanda ki, misal üçün bənd tikmək, yol çəkmək, kabel çəkmək bu qədər vəsait barədə rəqəmi haradan götürürsən!? Havadan. Sonra araşdırma aparılır, görünür ki, şişirdiblər. Nəyə görə şişirdiblər? Aydın məsələdir nəyə görə. Buna da son qoyulmalıdır. Ona görə Maliyyə Nazirliyi, İqtisadiyyat Nazirliyi, - bunu təkcə onların boynuna atmaq olmaz, - hökumət də nəzarətçi kimi şişirdilmiş bütün o rəqəmləri təhlil etsinlər və real rəqəmləri müəyyənləşdirsinlər. O rəqəmləri verənlər gərək məsuliyyət daşısınlar”.
Bu problemə toxunmağımız səbəbsiz deyil...Yenixeber.org-a bu istiqamətdə yeni məlumatlar daxil olub. Məlumatlarda Tovuz Rayon İcra Hakimiyyətinin “Təmir Tikinti-54” Məhdud Məsuliyyətli Cəmiyyəti (MMC) ilə əməkdaşlığından və dövlət vəsaitinin anlaşılmaz xərclənməsindən bəhs olunur. Daha doğrusu bir sıra suallara yol açan detallar sadalanır. Tovuz rayonundan yenixeber.org-a daxil olan məlumata görə Tovuz Rayon İcra Hakimiyyətinin “Təmir Tikinti-54” MMC-nə üstünlük verməsi heç də bəlli səbəblərlə bağlı deyil...
Xatırladım ki, təkcə ötən ilin sonuncu ayında tərəflər arasında üç müqavilə bağlanıb: Dekabrın 20-də bağlanan iki müqavilə ilə “Təmir Tikinti-54” MMC icra hakimiyyətini birinci dəfə 3840 manatlıq, ikinci dəfə isə 3155 manatlıq avadanlıqla təmin etməyi öhdəlik götürüb. Üçüncü müqavilə isə nə qədər qəribə görünsə də Tovuz Rayon İcra Hakimiyyətinin yeni il şənliyini təşkil etməsi ilə bağlıdır. Ötən il dekabrın 24-də bağlanmış 19500 manatlıq müqavilə ilə şirkət Tovuz Rayon İcra Hakimiyyətinin Yeni İl Şənliyinin təşkilini üzərinə götürür.
Əcəba, son illər dünyada və ölkəmizdə cərəyan edən məlum iqtisadi proseslər fonunda Tovuz Rayon İcra Hakimiyyətinin 19500 manatlıq Yeni İl Şənliyi hansı zərurətdən doğub? Tovuz Rayon İcra Hakimiyyətinin bu məbləğlə təşkil etdiyi Yeni İl Şənliyi hansı özəllikləri ilə fərqlənib? Dövlətin pulu hansı formada və hansı tədbirlərə xərclənib? Və s.
Bütün bu suallara cavab vermək Tovuz Rayon İcra Hakimiyyətinin borcudur. Hər bir tovuzlunun bunları bilmək haqqı və hüququ var. Nədən ki, söhbət bir dövlət sturukturunun dövlətin pulunu xərcləməsindən gedir. Belə də dövlət təşkilatının cəmiyyətə açıq olması, fəaliyyətinin maksimum şəffaflığı vacibdir. Bunun əksi isə şübhəli məqamları stimullaşdırır...
Tovuz Rayon İcra Hakimiyyətinin 19500 manatlıq Yeni İl Şənliyi ilə bağlı icra hakimiyyətinin saytında ictimailəşən məlumatlar isə bunlardır: Tovuzda da əlavə sosial müdafiəyə ehtiyacı olan əhali qrupuna daim diqqət göstərilir. 31 dekabr - Dünya Azərbaycanlılarının Həmrəyliyi Günü və Yeni il bayramı münasibətilə rayon icra hakimiyyətinin məsul işçiləri rayonun bütün yaşayış məntəqələrində 300-dən çox aztəminatlı ailələrə bayram sovqatı vermişlər.
Tovuz rayon İcra Hakimiyyətinin təşkilatçılığı ilə Dünya Azərbaycanlılarının Həmrəyliyi günü və Yeni il münasibətilə 31 dekabr tarixində Heydər Əliyev Meydanında saat 00:00-da atəşfəşanlıq olmuşdur.

Şəkildən də göründüyü kimi aztəminatlı ailələrə tam dolu olmayan paket verilir. (Paketlərin içində nəyin olması və sayının 300 olub-olması ilə işimiz yox. Həm də fotosesiyalarla). Və atəşfəşanlıq... Dövlətin 19500 manatının qarışılığında.

***
Dövlət satınalamaları haqqında qanundan da məlum olduğu kimi müsabiqənin qalibi olan şirkətin bir sıra standartlara uyğunluğu vacibdir. Bu sırada Tenderin qalibi olan şirkətin analoji işlərdə təcrübəsi, iddiaçının potensial, texniki və kadr imkanları, qalib olduğu müddətə qədər son bir ildəki fəaliyyəti haqqında vergi orqanları tərəfindən təsdiq olunmuş maliyyə hesabatı, son bir ildəki maliyyə vəziyyəti haqqında müvafiq bank arayışı və müvafiq mallar üzrə mənşə və uyğunluq sertifikatları kimi şərtlər sadalanır. Həmçinin qalib şirkətin təsis olunmasından 3 il zaman ötməsi də şərtlər sırasında yer alır.
Biz də müəyyən suallara cavab almaq səbəbindən “Təmir Tikinti-54 ” MMC ilə əlaqə yaratmağa çalışdıq. Belə bir müsabiqənin qalibi olan şirkət haqqında internet üzərindən axtarış cəhdlərimiz nəticəsiz oldu. Nə bir əlaqə vasitəsinə, nə bir "izinə-tozuna" rast ola bilmədik.
İnternet üzərindən heç bir əlaqə vasitəsinə rast olunmayan şirkətlə əməkdaşlığın bəzi detallarına aydınlıq gətirmək istəyi ilə bu ayın 13-də Tovuz Rayon İcra hakimiyyətinin başçısı cənab Məmməd Məmmədova online sorğu ünvanladıq. Təəssüf ki, o gündən bu günə sorğumuza cavab ala bilmədik. Telefon cəhdlərimiz də nəticəsiz oldu...
Satınalan təşkilat olaraq, Tender Komissiyasının formalaşmasında söz sahibi olan Tovuz Rayon İcra hakimiyyətinin sorğumuzu cavabsız qoyması təəssüf doğurduğu kimi, anlaşılan da deyil... Yuxarıda qeyd etdiyimiz kimi, bu halda Tovuz Rayon İcra hakimiyyətinin nəinki bir media orqanının sorğusuna, istənilən bir sıradan sorğuya həssas yanaşma kimi bir borcu var. Təəssüf ki, hələ də bəzi səlahiyyət sahibləri cəmiyyətə açıq olmaq kimi bir öhdəliklərinin olmasını ya bilmirlər, ya da bilib də bilməzdən gəlirlər.
Mövzu diqqətimizdədir.

yenixeber.org
Tovuzda dövlətin pulu belə havaya sovrulub - Atəşfəşanlıq, bir paket yardım

XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.