Ermənistan hakimiyyəti döyüşləri uduzduğunu etiraf edə bilmir. Bu addımı atıb danışıqlara başlamağa səy göstərmir. Əksinə, beynəlxalq ictimaiyyətin başını hələ də uydurma iddialarla qatmağa çalışır. Ermənistanın baş naziri Nikol Paşinyan və onun komandasının çıxışları, erməni diasporu və lobbisinin fəaliyyəti də bunu təsdiqləyir.
Prezident İlham Əliyev İtaliyanın “La Republica” qəzetinə müsahibəsində Azərrbaycanın ərazi bütövlüyü, ordusu, hərbi texnikası, Ermənistanın tutduğu işğalçı mövqe, Paşinyanın uşaq qatili olması kimi məsələlərə toxunub. Dövlət başçısı bildirib ki, Azərbaycan ərazi bütövlüyünü bərpa etməyə yaxınlaşır, Azərbaycan öz ərazisində döyüşür, Azərbaycan təcavüzkar deyil, başqa ölkələrə hücum etmir. İlham Əliyev Azərbaycan Silahlı Qüvvələrinin mükəmməl texnologiyası və çox yüksək döyüş ruhu olduğunu vurğulayıb.
Ermənistan Azərbaycan torpaqlarını 30 ildir işğal altında saxlayır. Bununla da onlar özlərini həmin torpaqların sahibi kimi aparırdılar. Ermənilər “məğlubedilməz orduları"nın olduğunu, Azərbaycan torpaqlarını təkbaşına işğal etdiklərini iddia edirdilər. Dövlət başçısı bu məsələlərə də toxunub: “Azərbaycan onlara kimin kim olduğunu sübut etdi. Azərbaycan sübut etdi ki, ermənilərin “guya məğlubedilməz ordusu” əfsanədir, mifdir və bunu qəbul etmək onlar üçün çox ağrılıdır”.
Ermənistan rəsmiləri, o cümlədən Nikol Paşinyan dünyanın bir sıra dövlətlərindən atəşkəsə nail olunması və ölkəsinə yardımlarla bağlı xahiş edir. Halbuki humanitar atəşkəslə bağlı əldə edilən 3 razılaşmanı Ermənistan pozub. Onların bu təzadlı müraciətləri və davranışı deməyə əsas verir ki, Ermənistan danışıqlara hazır deyil. Nikol Paşinyanın Rusiya prezidenti Vladirmi Putinə yardımla bağlı müraciət etməsinə münasibət bildirən dövlət başçısı deyib: “Baş nazir Paşinyan prezident Putinə məktub göndərərək hərbi yardım xahiş edib. Bu, onların hərbi məğlubiyyətlərini və Azərbaycanın qələbəsini qəbul etmələri deməkdir”. Beləliklə, Ermənistan ordusu Ali Baş Komandanın rəhbərliyi ilə Azərbaycan Ordusu tərəfindən darmadağın edilir. Ermənilərin yaratdığı “məğlubedilməz ordu” barədə mifi dağıdır. Bu, Azərbaycanın təkcə hərbi üstünlüyü və qələbəsi deyil, həm də ideoloji müstəvidə Ermənistanın məğlubiyyətidir.
Azərbaycan tərəfi döyüşləri dayandırmağa hər zaman hazır olduğunu dəfələrlə bildirib. Bunun üçün Ermənistan işğal altında olan Azərbaycan torpaqlarından ordusunu çıxarmalıdır. Bu, Prezidentin çıxış və müsahibələrində dəfələrlə vurğulanıb. Dövlət başçısı bildirib ki, Ermənistanın baş naziri işğal edilmiş yerdə qalan ərazilərin boşaldılacağına dair üzərinə öhdəlik götürsə, Azərbaycan bu gün dayanmağa hazırdır: “Üç atəşkəs artıq pozulub. Buna görə Ermənistan günahkardır. Paşinyan müharibənin dayanmasını istəmir. Ermənistan mülki şəxslərə hücum etməklə Azərbaycanda xaos və panika yaratmaq istəyirdilər. Lakin onlar Azərbaycan xalqının ruhunu düzgün hesablaya bilməmişdilər. Bu, bizim iradəmizi sındırmadı. Əksinə, bu, bizi daha da güclü etdi”.
Prezident İlham Əliyev beynəlxalq ictimaiyyətin Azərbaycanın ərazi bütövlüyünü dəstəklədiyini vurğulayaraq Ermənistan hakimiyyətinin beynəlxalq hüququ pozmalarından bəhs edib: “Paşinyan Prezident Putinə gündə beş dəfə zəng edir, o, Prezident Makrona zəng edir, o, hər kəsə zəng edir. O, Dağlıq Qarabağın tanınmasını xahiş edir, lakin başa düşmür ki, Azərbaycanın ərazi bütövlüyü ilə bağlı Avropa İttifaqının vahid mövqeyi var. Paşinyan müəyyən dəstəyi əldə etmək üçün hər bir feyk üsuldan istifadə etməyə çalışır”.
Baş verənlər deməyə əsas verir ki, Paşinyan etdiyi səhvləri düzəltmək əvəzinə, ölkəsini tam tənəzzülə aparır. O, bütün vasitələrlə öz hakimiyyətini qorumaq üçün əlini öz xalqının da qanına batırır, ona etiraza qalxanları döyüşçü qismində zorla Qarabağda ölümə göndərir, bununla həm də ondan narazı təbəqəni təmizləyir.
Ermənistan Gəncə, Bərdə, Tərtər, Goranboy və Mingəçevirdə mülki obyektləri raket atəşinə tutur. Ermənistan baş naziri tarixdə Gəncə və Bərdə hadisələrinə görə “uşaq qatili” kimi qalacaq və daim lənətlənəcək. Eyni zamanda döyüşlər Nikol Paşinyanın siyasi karyerasını da həll edir. O, siyasi ölüyə çevrilir. Dünya liderləri də onun yalanlarından yorulub.
Deməli, faşistlər keçmiş SSRİ-yə hücumdan sonra bildirmişdilər ki, qapını açsalar da, sovet xalqının müqavimət əzmini düzgün qiymətləndirməmişdilər. Faşist Ermənistan hakimiyyəti də Azərbaycan xalqının ruhunu düzgün hesablaya bilməyib. Onlar elə zənn edirdilər ki, döyüş bölgələrindən uzaqdakı şəhər və yaşayış məntəqələrini atəşə tutmaqla ölkədə xaos yaradacaqlar. Ancaq əksinə, Gəncə, Bərdə hadisələri Azərbaycan xalqının müqavimətini daha da artırdı, onu daha da güclü etdi.
Prezident münaqişənin həllində vasitəçilik edənlərin neytral olmasına diqqəti xüsusi olaraq yönəldib. Əks halda onların bu funksiyanın öhdəsindən gələ bilməyəcəkləri qeyd olunub. Dövlət başçısı bildirib ki, Türkiyə Azərbaycanın yanındadır: “Bu, yalnız siyasi və mənəvi dəstəkdir. Türkiyə kimi güclü ölkə bu məsələ ilə bağlı mövqeyini açıq şəkildə bəyan edəndə həm də bütün dünyaya mesaj göndərir ki, Azərbaycan doğru işi görür”.
İlham Əliyev Ermənistan və havadarlarının Azərbaycan tərəfdə muzdluların döyüşməsi barədə uydurmalarına cavab olaraq vurğulayıb ki, bu, Azərbaycana qarşı siyasi hücum təəssüratı yaradır: “Əcnəbilərin Ermənistan tərəfdən döyüşdüyünə dair kifayət qədər dəlillər var. Əgər əcnəbi vətəndaş bir ölkə tərəfindən digər ölkəyə qarşı döyüşürsə, o, muzdludur”. Ermənistan ordusuna və separatçılara PKK və Yaxın Şərqdən bəzi terrorçular qoşulublar. Bunu təsdiqləyən çoxsaylı faktlar var. Hələ əvvəlki döyüşlərdə də Livan, Suriya və Avropanın bir sıra ölkələrindən terrorçular üçün terrorçuların Qarabağda ermənilər tərəfdən vuruşduğu təsdiqlənib. Bundan başqa, Ermənistan işğaldan sonra Qarabağda terrorçular üçün təlim düşərgəsi belə yaratmışdı. Bu baxımdan muzdlulardan və terrorçulardan Ermənistan həmişə yararlanıb. Yeri gəlmişkən, onların ASALA adlı terror təşkilatı var. Bu ermənilərin terror kimi cinayətlərlə məşğul olduğunu təsdiqləyən amillərdəndir.
Dövlət başçısı Qarabağın etnik tərkibindən də danışıb: “Şuşada 98 faiz azərbaycanlılar məskunlaşmışdılar. Bu gün orada bir nəfər azərbaycanlı belə yoxdur. Xankəndidə çox sayda azərbaycanlı var idi. Hadrut rayonunda, digər rayonlarda, soyqırımı törətdikləri Xocalıda 100 faiz azərbaycanlılar idi. Beləliklə, onların hamısı etnik təmizləməyə, işgəncəyə məruz qalıb, didərgin salınıblar, qətlə yetiriliblər. Təəssüflər olsun ki, heç kim Ermənistanı bunda günahlandırmayıb”. Prezident əvvəllər də çıxışlarında bildirib ki, Azərbaycan vətəndaşı olan ermənilər burada yaşaya bilər. Onlar Azərbaycanın bərabərhüquqlu vətəndaşlarıdır. Dövlət başçısı Dağlıq Qarabağda yaşayan ermənilərin təhlükəsizliyinin təmin olunacağını vurğulayıb. Azərbaycan Ermənistandan fərqli olaraq, multietnik, çoxkonfessiyalı ölkədir. Ermənistan əhalisinin 99 faizi etnik ermənilərdir. Regionda bir millətin belə üstünlük təşkil etdiyi başqa bir ölkə yoxdur. Onlar ölkədən başqa etnik qrupların nümayəndələrini qovublar. Başqa sözlə, Ermənistan etnik təmizləmə aparıb.
“Xain xoflu olar”. Bu baxımdan, Ermənistan Azərbaycan barədə mənfi rəy formalaşdırmağa çalışır. Guya Qarabağda erməni əhalisinin “soyqırımına” məruz qalacağı barədə danışmaq tamamilə qəbuledilməzdir. Halbuki həm vaxtilə Ermənistanda, həm də Qarabağda ermənilər tərəfindən azərbaycanlılar soyqırıma məruz qalıb. Xocalı soyqırımını demək kifayətdir.
Beləliklə, Prezident İlham Əliyev Qarabağla bağlı tarixi həqiqətlər, reallıqlardan danışıb, ermənilərin uydurmalarını ifşa edərək “La Republica”nın oxucularını, dünya ictimaiyyətini Azərbaycanın haqq işi barədə məlumatlandırıb. Dövlət başçısı Qarabağın Azərbaycan olduğunu və azərbaycanlı əsgərlərin öz torpaqlarını işğaldan təmizlədiyini bir daha onların diqqətinə çatdırıb. \\report.az\\
