Bu gün Mərkəzi Seçki Komissiyasının (MSK) iclası keçirilib.

İclasda Azərbaycanda aprelin 11-ə təyin edilən prezident seçkilərində namizədliyi Yeni Azərbaycan Partiyası tərəfindən irəli sürülmüş İlham Əliyevin namizədliyinin qeydə alınması məsələsinə baxılıb.

Qeyd olunub ki, İlham Əliyevin namizədliyinin qeydə alınması üçün kifayət qədər imza toplanılıb.

Daha sonra məsələ səsə qoyularaq İlham Əliyevin prezidentliyə namizədliyi qeydə alınıb.

İclasda bildirilib ki, Yeni Azərbaycan Partiyası tərəfindən İlham Əliyevin prezidentliyə namizədliyinin qeydə alınması üçün MSK-ya 45 min seçici imzası və müvafiq sənədlər təqdim edilib. İmzaların və sənədlərin düzgünlüyü işçi qrupu tərəfindən yoxlanılıb. Seçki sənədləri kifayət qədər yüksək səviyyədə və Seçki Məcəlləsinin tələblərinə uyğun hazırlanıb.

Təqdim olunan 45 min imzanın 42 mini yoxlanılıb və bu imzalar namizədliyin qeydə alınması üçün kifayət etdiyi üçün imzaların yoxlanması prosesi dayandırılıb. Bildirilib ki, İlham Əliyevin prezidentliyə namizədliyinin qeydə alınması üçün hüququi əsaslar mövcuddur.

***

MSK sədri Məzahir Pənahov bildirib ki, bütün maraqlanan tərəflər istənilən sənədlə tanış olmaq hüququna malikdir: “Bu format axıra kimi davam edəcək. Onlar nə vaxt istəsələr prosesdə iştirak edəcəklər”.

O qeyd edib ki, toplanan imzalarda hamının pasport sənədləri yoxlanılıb: “Heç birində zərrə qədər nöqsan olmayıb. Ancaq partiya nümayəndələri deyirdilər ki, 45 min imzanın hamısı yoxlanılsın. Prosedur cəhətdən isə 40 min imza düzgün hesab olunduğundan əlavə imzaların yoxlanılmasına ehtiyac yoxdur”.

MSK üzvü Mikayıl Rəhimov isə nəzərə çatdırıb ki, bu il Yeni Azərbaycan Partiyası əvvəlki seçki proseslərindən fərqli olaraq imzatoplama mərasimində yeniliyə imza atıb: “ Belə ki, bu dəfə imzatoplama prosesində 800 nəfər iştirak edib”.