“Era Tower” yaşayış binasından mənzil alan vətəndaşlar səkkiz ildir ki, evlərinə köçə bilmirlər.

Bununla bağlı təxminən 20 gün əvvəl Oxu.Az-a bina sakinlərinin şikayəti daxil olub.

Bildirilib ki, binanın yarımçıq qalmasının səbəbi tikintini həyata keçirən “MACAZ Construction” MMC-nin Ağ Şəhərə olan milyonlarla borcunu ödəməməsidir.

Bir neçə gün öncə şirkətin direktoru Rəşad İsmayılovla əlaqə saxladıqda o, maliyyə probleminin aradan qaldırıldığını, bir həftəyə tikintiyə yenidən başlanılacağını və altı-səkkiz aya sakinlərin evlərinə köçə biləcəyini vurğuladı.

Lakin ötən gün mənzil sahibləri yenidən Oxu.Az-a müraciət edərək problemin aradan qaldırılmadığını diqqətə çatdırdılar. Təkrar Rəşad İsmayılova zəng vurduqda qurum rəsmisi bu dəfə də bir gün sonra, yəni 13 oktyabr tarixi üçün Ağ Şəhərlə müqavilə bağlanılacağını dedi.

Bu gün müqavilənin bağlanıb-bağlanmadığına dair məlumat əldə etməyə çalışdıqda isə Rəşad İsmayılov yenə eyni sözləri təkrarlayaraq yaxın dövr üçün “Era Tower” sakinlərinə vədlər verdi. Proseslə bağlı qısa bir araşdırma apardıqda Rəşad İsmayılovun üç ay əvvəl də eyni açıqlama ilə çıxış etdiyini aşkarladıq. Görünən odur ki, Bakının mərkəzində onlarla insanın yüz minlərlə pulu mənimsənilib və buna qarşı heç bir tədbir görülmür.

Oxu.Az