SON DƏQİQƏ
XalqXeber.Az » Gündəm » Kəmaləddin Heydərovun “düşmənləri”: onlar ya həbs olunur, ya da…

Kəmaləddin Heydərovun “düşmənləri”: onlar ya həbs olunur, ya da…

Tarix:

11-12-2017, 11:22

/ 1 847 dəfə oxundu.
Kəmaləddin Heydərovun “düşmənləri”: onlar ya həbs olunur, ya da…

17 ildən artıqdır Vergilər naziri postunu tutan Fazil Məmmədovun 2 gün əvvəl Prezident İlham Əliyev tərəfindən vəzifəsindən azad olunması ətrafında müzakirələr davam edir və çox güman ki, ən azı bu ayın sonunadək də davam edəcək. F.Məmmədovun “vurulması” ilə bağlı mediada müxtəlif istiqamətli təhlillər, şərhlər, rəylər yer almaqdadır.
Əksəriyyət verilən qərarı 2 amillə bağlayır: Fazil Məmmədov səhhəti ilə əlaqədar işdən çıxarılıb və yaxud da onun istefaya göndərilməsi sahibkarların vergidən artan narazılıqları ilə bağlıdır. Fazil Məmmədov özü də açıqlamasında konkret fikir söyləməkdən yayınsa da, işdən çıxarılmasının səhhəti ilə bağlı olduğuna işarə vurub.
Uzun illərdir Vergilər naziri postunu tutan, bu müddət ərzində Azərbaycanın ən qüdrətli oliqarxlarından birinə çevrilən, var-dövləti milyardlarla ölçülən və səs-sədası hətta ofşorlardan belə gələn Fazil Məmmədovun “vurulması” bir başqa kontekstdən də diqqətçəkəndir: F.Məmmədov Fövqəladə Hallar naziri Kəmaləddin Heydərovla münasibətlərini düşmənçilik həddinə çatdırmaqdan çəkinməyib, lakin sonda məğlub olan sayca altı-yeddinci nazir oldu. Bununla da hakim komanda daxilində düşmənçilik elementləri daşıyan daha bir rəqabətə son qoyulmuş oldu!
Xatırlatmaq yerinə düşər ki, Fazil Məmmədov uzun illər hökumət daxilində məhz Kəmaləddin Heydərov çevrəsinə daxil olan, onun tərəfindən dəstəklənən nazirlərdən biri sayılıb. Elə onun nazir vəzifəsinə irəli çəkilməsində də Kəmaləddin Heydərov həlledici rol oynayıb, qərar onun təqdimatı əsasında verilib. Təsdüfi deyil ki, Vergilər Nazirliyi uzun illər Kəmaləddin Heydərovun təsir sferasına daxil olan dövlət qurumlarından biri idi.
fazilkemaleddinLakin təxminən 2008-2009-cu illərdə vəziyyət dəyişdi. Fazil Məmmədov həmin dövrlərdə Kəmaləddin Heydərovun “patronajlığından” çıxaraq, başqa “gücün” himayəsi altına sığındı. Bununla da münasibətlərdə yaranan soyuqluq, illər keçdikcə gücləndi və son 2-3 ildə hətta düşmənçilik səviyyəsinə çatdı.
Bu düşmənçiliyə əsas səbəb kimi isə, Fazil Məmmədovun ölkədə yaranmış maliyyə böhranı ilə bağlı ona verilmiş əlavə səlahiyyətlərdən istifadə edərək, sözün həqiqi mənasında Kəmaləddin Heydərovun biznes obyektlərinin üzərinə “çokməsi”, onları iri məbləğdə vergi ödəmək məcburiyyətində buraxması göstərilir. Bu “vergi hücumundan” sonra bəzi biznes obyektlərini bağlamaq məcburiyyətində qalan Heydərovu daha çox qəzəbləndirən isə Fazil Məmmədovun onunla bağlı ölkə rəhbərliyinə doğru olmayan məlumatlar verməsi olub. Hansı ki, bu məlumatlar Kəmaləddin Heydərovun etibarını və sədaqətini müəyyən qədər şübhə altına sala bilərdi…
F.Məmmədovun keçmiş “şefinə” növbəti zərbəsi, təxminən 2 il əvvəl Gömrük Komitəsini ləğv elətdirmək cəhdi oldu. Neftin qiymətinin kəskin düşməsilə əlaqədar ölkədə baş qaldıran maliyyə böhranı dövlət idarəsiliyinin optimallaşdırılmasını gündəmə gətirmişdi. Fürsətdən istifadə edən F.Məmmədov, ölkə rəhbərliyini Gömrük Komitəsinin ləğvinə və onun səlahiyyətlərinin Vergilər Nazirliyi ilə ASAN Xidmət arasında bölüşdürülməsinin vacibliyinə inandıra bilmişdi. Həmin vaxt K.Heydərov çətinliklə Gömrük Komitəsini xilas edə bildi. Bu hadisədən sonra Heydərovla Məmmədovun münasibətlərindəki gərginlik daha da artmış, hətta demək olar ki, onlar barışmaz düşmənə çevrilmişdilər.
Fazil Məmmədovun işdən çıxarılmasından cəmi 1 gün əvvəl K.Heydərovun Vergilər Nazirliyinin insan resursları Departamentinin baş direktoru vəzifəsində işləyən yeznəsi Faiq Şahbazovun vəzifəsindən azad olunmasının, barəsində danışdığımız məsələlərlə nə dərəcədə bağlılığının olduğu isə sirr olaraq qalır.
İstənilən halda, F.Məmmədovun hakim komandanı, – “gəmini” birinci tərk etməsi Kəmaləddin Heydərovun növbəti qələbəsidir. Prezidentin 5 dekabr sərəncamı FHN başçısının hakimiyyət daxilindəki mövqelərinin güclənməsinə xidmət edəcək. Çünki Məmmədovun vəzifəsindən çıxarılmasına dair qərar, cəmiyyətdə mövcud olan “hakimiyyət daxilində Kəmaləddin Heydərovla düşmənçilik edənlər gec-tez sıradan çıxarılır” fikrini bir daha təsdiqləmiş oldu.
Cəmiyyətdə belə bir fikrin yaranması isə heç də təsadüfi deyil. 1995-ci ildən mövcud hökumətdə təmsil olunan Kəmaləddin Heydərovla düşmənçilik edənlərin əksəriyyəti vəzifəsini, bəziləri isə hətta azadlığını, varidatını itirib. Keçmiş Milli Təhlükəsizlik naziri Namiq Abbasov, keçmiş İqtisadi İnkişaf nazirləri Fərhad Əliyev və Heydər Babayev, keçmiş Müdafiə naziri Səfər Əbiyev, keçmiş Nəqliyyat naziri Ziya Məmmədov, keçmiş Vergilər naziri Fazil Məmmədov... Bunların hamısını birləşdirən bir ortaq yanları var – hamısı K.Heydərova aşkar və ya gizli, düşmənçilik mövqeyində olub, hamısı da sonda məğlub olublar.

İ. İsmayılbəyli, AzPolitika.info

Şərhlər

XƏBƏR LENTİ