Standartlaşdırma, Meterologiya və Patent Komitəsi ilə “Meliorasiya və Su Təsərrüfatı” ASC üçün sınaq dövrü başlanıb

Bu barədə daxil olan məlumata görə, komitə sədri Ramiz Həsənovla ASC rəhbəri Əhməd Əhmədzadənin fəaliyyəti ciddi şəkildə narazılıq doğurub.

Yuxarı dairələrdə gedən müzakirələrdə hər iki dövlət məmurunun işində yol verdiyi nöqsanların aradan qaldırılması tələb olunub.

Eyni zamanda bu iki strukturun özlərinə yaxın idarələrə birləşdirilməsi təklif edilib. Komitənin İqtisadiyyat Nazirliyinə, ASC-nin isə “Azərsu” ASC-yə verilməsi təşəbbüsü irəli sürülüb.

Son qərarı prezident verəcəyinə baxmayaraq, artıq postneft dövrünün tələbindən irəli gələrək iki iri dövlət qurumunun struktur islahatlarına qurban verilməsi labüddür.

Mənbə qeyd edir ki, Əhmədzadənin yerlərdəi adamlarının özbaşınalıqları və ümumilikdə yeyinti faktları, o cümlədən büdcə pullarının sovrulması, komitənin isə iş adamlarını narazı salması dövləti bu addımları atmağa vadar edir.

Daxil olan məlumata görə, ölkədə iqtisadi böhranın dərinləşməsi həmin qurumların ləğvini qaçılmaz edib və bəzi qüvvələrin müqaviməti də fayda vermir.

Qeyd edək ki, deputat Zahid Oruc bir müddət əvvəl iri dövlət qurumların ləğvinin anonsunu vermişdi. Deputat təklif etmişdi ki, bəzi qurumlar demontaj olunmalıdır.

Sitat: “Meliorasiya və Su Təsərrüfatı Açıq Səhmdar Cəmiyyəti Kənd Təsərrüfatı Nazirliyinə birləşdirilsin. Çünki ölkədə aqrar siyasət KTN hesabına reallaşdırılır.

Həmçinin Standartlaşdırma, Metrologiya və Patent üzrə Dövlət Komitəsi İqtisadi İnkişaf Nazirliyinin bir strukturuna çevrilə bilər. Bir sözlə, idarəçilik təkmilləşdirildikcə neft amilindən nisbətən xilas ola biləcəyik”.

Bildirilir ki, hakimiyyət uzun müddətdir bu müəssisələrin ləğvinə çalışır. Amma bəzi siyasi konyukturaya görə mümkün olmurdu.