Tailand və Kamboca sərhəddə gərginliyi azaltmaq məqsədilə müvəqqəti atəşkəs elan olunması barədə razılığa gəliblər.

Bu barədə yerli KİV məlumat yayıb.

Məlumata görə, sabahdan etibarən qüvvəyə minəcək atəşkəs rejimi ilkin mərhələdə 72 saat davam edəcək. Razılaşmanın müddətinin uzadılması məsələsi isə Tailand Milli Təhlükəsizlik Şurasının verəcəyi yekun qərardan asılı olacaq.

Xatırladaq ki, iki ölkə arasında hərbi toqquşmalar dekabrın 8-də yenidən alovlanmışdı. Vəziyyətin gərginləşməsindən bir neçə gün sonra ABŞ Prezidenti Donald Tramp tərəfləri hərbi əməliyyatları dayandırmağa və ötən ilin oktyabrında imzalanmış sülh müqaviləsinin şərtlərinə qayıtmağa çağırmışdı. Dekabrın 24-də start verilən intensiv diplomatik danışıqlar nəticəsində isə tərəflər silahları müvəqqəti yerə qoymağa razı olublar.