Hələ də 24-27 oktyabr 2023-cü il tarixli, Özbəkistanlı günlərimin xoş təəssüratlarının girovundayam.
Səfərimiz zamanı bu qardaş ölkədə yaşayıb, çalışan həmvətənlərimizin isti qəbulu, görüləcək işlərdə bizə verdikləri dəstək, eləcə də özbək bacı və qardaşlarımızın diqqət çəkən qonaqpərvərliyi anban göz önünə gəlib, xəyalımı yalnız bir istiqamətə - Özbəkistana yönəldir.
Özbəkistana Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “İsmayıllı Yazarları” ədəbi-ictimai birliyinin layihəsi əsasında hazırlanmış “Şuşa: Türkün zirvəsi” adlı sənədli filmlə getmişdik. Xatırladım ki, layihənin müəllifi adı çəkilən birliyin sədri, bəndəniz Şahməmməd Soltanov, ssenari müəllifi və rejissoru Etibar Məmmədov, redaktoru Büllur Məmmədovadır.
Özbəkistandakı Heydər Əliyev adına Azərbaycan Mədəniyyət Mərkəzinin (AMM) ev sahibliyi və bu Mərkəzdə çalışanların yaxından köməkliyi ilə təqdimat öncəsi filmin yaradıcı heyəti olaraq əvvəlcə Daşkənd şəhərindəki Heydər Əliyev parkında ümummilli liderimiz Heydər Əliyevin xatirəsinə ucaldılan abidəsi və Ulu öndərin AMM-nin binası qarşısındakı abidəsi önünə tər qızılgül dəstələri qoyduq. Mərkəzin əməkdaşlarından və yerli sakinlərdən sıramıza qoşulanlar da oldu.
Təqdimatda Mərkəzin əməkdaşı Kərim Məmmədzadə layihənin Özbəkistanla bağlılığının bir sıra məqamlarına aydınlıq gətirdi və ekran əsərinin Daşkənddə təqdimatının keçirilməsindən məmnunluq ifadə etdi.
Birliyin və layihnin rəhbəri Ş.Soltanov, filmin redaktoru B.Məmmədova çıxışlarında “Şuşa: Türkün zirvəsi” sənədli filmində bir sıra mühüm tarixi məsələlərə yer verdilər.
Çıxışlarda və izlənilən filmdə alqışlanan məqamlar da az olmadı. Onu xüsusilə qeyd edim ki, film özbəkistanlı izləyicilərə onların öz ana dilində təqdim olundu.
Ssenari mətninin tərcüməçisi - bu bacarıqla Azərbaycanda xeyli dost qazanmış şairə Gülzirə Şaripova, mətni xüsusu məharətlə səsləndirən Dilfuzə Şahnəzərovadır.Təqdimatın gedişini fotolentin yaddaşın köçürən isə peşəkar jurnalist, “Xalq” qəzetinin xüsusi müxbiri, Özbəkistanda yaşayan əziz həmyerlimiz Qulu Kəngərli oldu. Təqdimatın hərəkətli çəkilişini operator dostumuz İlqar yerinə yetirdi.
Filmin nümayişindən sonra izləyicilərdən bir qrupunun “Qarabağ” mahnısının oynaq sədaları altında rəqsi təqdimatı xoş ovqatla yekunlaşdırdı. Özbəkistanlı sosial şəbəkə dostlarımızdan bir qrupunun səfərimizdən xəbər tutub görüşümüzə gəlməsi də bizə günün və tədbirin unudulmaz anlarını yaşatdı.
Beləliklə, 27 oktyabır 2023-cü il tarixi üçün təqdimatı nəzərdə tutulan tədbirimiz uğurla başa çatdı. Qarşıdakı günün səhərini Azərbaycanda açdıq.
Təkrar olsa belə, maliyyə dəstəyinə görə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyininə, filmin ərsəyə gəlməsində və təqdimatın lazımi səviyyədə keçməsində zəhməti olan hər kəsə minnətdarlıq və təşəkkür etməyi özümə bir daha borc bildim.
Səfərdən sonra bu şeiri yazmağa da vaxt tapıldı:
Bir bədəndə iki can
Səni mənim qədər kim sevə bilər,
Oğlun, qızın mənə can söyləyir, can.
Orda hamı mənə xoşbəxtlik dilər,
Sən canım, ruhumsan, can Özbəkistan!
Doymadım dostların xoş söhbətindən,
Biri qardaş dedi, birisi ustad.
Güc aldım doğmalıq səadətindən,
Dostların fərəhi məni etdi şad.
Boyumu bir dəfə görməyən biri,
Boynuma sarıldı, canımsan dedi.
Nələr gördüyümün yoxdur təsviri,
Haqq bilər bu sevgi, bu istək nədi.
Yazdım ürəyimə Özbəkistanı,
Bu ad bir nəğmədir dildə, ağızda.
Aldım göz önünə bütün cahanı,
Bu yerdə cənnətdir yaz da, payız da.
Səni mənim qədər sevməz hər yetən,
Nəvai beşiyi, ey qədim məkan!
Tapın, sevgi tapın bu sevgimə tən –
Olsun bir bədəndə qoşa, əkiz can!
30 oktyabr 2023-cü il
