Jurnalistlərin "Ankara xatirəsi"...
“Modern.az” saytının baş redaktoru Elşad Eyvazlı Kütləvi İnformasiya Vasitələrinin İnkişafına Dövlət Dəstəyi Fondunun sabiq icraçı direktoru Vüqar Səfərlinin də adı keçən xatirəsini bölüşüb.
E.Eyvazlı bir neçə il öncə, azərbaycanlı jurnalistlərin Ankara səfərini belə nəql edib: “Azərbaycanın 30-a yaxın baş redaktoru qışda Ankarada səfərdə idi. Ankaranın qışını da bilirsiniz...
Bizi bir avtobusa yığmışdılar. Avtobus addımbaşı sürüşürdü...
Birdən Rauf Arifoğlu dedi ki, avtobus yaman sürüşür, bu sürüşmədə bir arzusu var. Hamı maraq etdi.
Arifoğlu davam etdi ki, arzusu odur, avtobus qəzaya düşsün, tək Qənimət Zahid ölsün. Bakıya qayıdanda “Azadlıq” qəzetinin kollektivinə desin ki, Qənimət vəsiyyət etdi ki, qəzet sənin olsun.
Qənimət Zahid dedi başqa bir vəsiyyəti də var. Bu dəfə diqqətlər ona yönəldi.
Bildirdi ki, Vüqar Səfərli ilə yan-yana oturub. O ölsə Vüqar Səfərli də sağ qalmayacaq. Vəsiyyəti odur ki, onu Vüqar Səfərli ilə bir qəbirdə dəfn etsinlər.
Sonrasını özünüz düşünün... Sizcə nə ola bilərdi?
Vüqar Səfərli onunla bir qəbirdə dəfn olunmağa çox kəskin etiraz etdi. Avtobus qəza törətməsə də arzu və vəsiyyətlər aləmi qatdı..
