Deputat oğlu adam oğurluğu haqda istintaqa ifadə verib, 2 məmurun adını çəkib
- 3-11-2018, 10:38
- 3 306
Həbib Axundov sözlərinə görə, hadisə 31 iyul 2013-cü il tarixdə baş verib. Babayev və Surxayzadə Elnur İbrahimova külli miqdarda pulun şəkilini göndərib həmin pulu ona verəcəklərini deyib görüşə çağırıblar. Elnur İbrahimov görüşə gedib, Babayev və Surxayzadə onu tutub saxlayıblar. Maraqlıdır ki, deputat oğlunun ifadəsi araşdırılmamış qalıb.
Deputat Elmira Axundova Elnur İbrahimovun işi üzrə zərərçəkənlər haqda deputat blankında şikayətlər yazdığı bir vaxtda, Anar Babayev və Anar Surxayzadənin əməllərinin araşdırılması üçün hər hansı bir addım atmayıb.
Anar Babayev və Anar Surxayzadə Vergilər Nazirliyinin əməkdaşları olduqları müddətdə bu gün Bakı Ağır Cinayətlər Məhkəməsində dələduzluqda təqsirləndirilən Elnur İbrahimova külli miqdarda pul veriblər. Məbləğ nə az, nə çox - üst-üstə 550 min manat civarında olub. Sonradan Elnur İbrahimov aldadılmaqla evini Anar Surxayzadənin adına keçirib. Onu aldadan da elə Anar Surxayzadə olub. O, bunu gizlətməyib də. Adı istintaqa Həbib Axundov tərəfindən Elnur İbrahimovu qanunsuz saxlayan 2 nəfərdən biri kimi çəkilən Anar Surxayzadə maraqlıdır ki, ibtidai istintaqda 4 il sonra, həm də şahid qismində dəvət olunub, dindirilib. O, Elnur İbrahimovu aldatmaqla evini öz adına keçirdiyini etiraf edib. İbtidai istintaqda Anar Surxayzadənin bu ifadəsinə hüquqi qiymət verilməyib. Hazırda məhkəmədə də bu məsələlər araşdırılmır. Anar Babayev isə məhkəmə istintaqından yayınır.
Vergilər Nazirliyi işçilərinin qanunsuz biznesə pul yatırmaları haqda yaranan suallara da aydınlıq gətirilmir. Vergilər Nazirliyinin hər 2 əməkdaşının dövlətə vergi ödəmədən dövr etdirilən biznesə pul qoyub pul götürmələri də istintaqçılarıngözündən niyə yayınıb bilinmir. Dövlətin mənafelərinin Daxili İşlər Nazirliyi müstəntiqinin çıxdaş etməsi suallar doğurur.
Baş verənlər ümumilikdə maraqlı səhnəni ortaya çıxarır – deputat oğlu 2 vergi məmurunun cinayəti haqda istintaqa danışır. Bu məsələ araşdırılmır.
İstintaqa çağırılan vergi işçisi Həbib Axundovun şərikini aldadıb evini öz adına keçirdiyini deyir. Yenə də araşdırma aparılmır.
İstintaqda üzdən aparılan dindirmə ortaya külli miqdarda vergidən yayınma cinayətini çıxarır. Yenə də araşdırma getmir.
Bu məsələlərin araşdırılmaması isə ümumilikdə dövlətin mənafelərinə yumşaq desək təpik atmaqdır, hüquq mühafizə orqanlarına inamı artıran ədalətli araşdırma prinsiplərinə tüpürməkdir.
Criminal.az