XalqXəbər.Az

XalqXeber.Az » Sosial » NƏRİMANOV RAYONUNDA 2 FEVRAL - GƏNCLƏR GÜNÜ ŞƏHİD AİLƏLƏRİNİN VƏ QAZİLƏRİN ƏHATƏSİNDƏ QEYD OLUNMUŞDUR

NƏRİMANOV RAYONUNDA 2 FEVRAL - GƏNCLƏR GÜNÜ ŞƏHİD AİLƏLƏRİNİN VƏ QAZİLƏRİN ƏHATƏSİNDƏ QEYD OLUNMUŞDUR

NƏRİMANOV RAYONUNDA 2 FEVRAL - GƏNCLƏR GÜNÜ  ŞƏHİD AİLƏLƏRİNİN VƏ QAZİLƏRİN ƏHATƏSİNDƏ QEYD OLUNMUŞDUR
2-02-2021, 17:51

2 fevral - Gənclər Günü münasibəti ilə Azərbaycan Respublikası Milli Məclisinin sədr müavini Adil Əliyevin və Nərimanov Rayon İcra Hakimiyyətinin başçısı Abdin Fərzəliyevin torpaqlarımızın işğaldan azad edilməsində, tarixi qələbənin qazanılmasında şücaət göstərən şəhidlərin övladları, gənc qazilərin və rayon könüllülərinin bir qrupu ilə Rayon İcra Hakimiyyətində görüşü keçirilmişdir. Görüşdə çıxış edən Abdin Fərzəliyev qeyd etdi ki, Respublikamızın müstəqilliyini, təhlükəsizliyini, ərazi bütövlüyünü təmin etmək kimi müqəddəs vəzifəni yerinə yetirən vətəndaşlarımızın mütləq əksəriyyəti gənclərdir. Müzəffər Ali Baş Komandan cənab İlham Əliyevin rəhbərliyi ilə torpaqlarımızın işğaldan azad olunması uğrunda Vətən müharibəsində iştirak edən gənclərimiz Qələbə naminə canlarını belə qurban verməkdən çəkinmədilər. O, çıxışında ömrünün ən gözəl çağında şəhid olan gənclərimizə Allahdan rəhmət, qazilərimizə şəfa dilədi.
Rayon İcra hakimiyyətinin başçısı Abdin Fərzəliyev vurğuladı ki, Azərbaycan Respublikasının Prezidenti cənab İlham Əliyevin və Azərbaycan Respublikasının Birinci vitse-prezidenti Mehriban xanım Əliyevanın şəhid ailələrinə və qazilərə göstərdiyi diqqət və qayğı ən yüksək səviyyədədir və bu xeyirxah münasibət xalqımız, xüsusilə də şəhid ailələri tərəfindən çox böyük minnətdarlıqla qarşılanmaqdadır. Möhtərəm Prezident cənab İlham Əliyevin Fərmanı ilə Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək məqsədilə “YAŞAT” Fondunun yaradılması, Fond tərəfindən qısa müddətdə ciddi işlərin görülməsinə başlanılması nəticəsində həyata keçirilən intensiv tədbirlər artıq öz təsirli nəticələrini verməkdədir.
Möhtərəm Prezidentimiz cənab İlham Əliyev və Birinci vitse-Prezident Mehriban xanım Əliyevanın tövsiyələri və şəxsi nümunələri rəhbər tutularaq Nərimanov Rayon İcra Hakimiyyəti də Vətən oğullarının xatirəsini əziz tutmağı, onların ailələrinə qayğı göstərməyi gündəlik vəzifəsi bilir, hər bir şəhid ailəsinə və qaziyə xüsusi həssaslıqla yanaşır, mütəmadi olaraq onların ailələrinə baş çəkir, problemlərini dinləyir, həll olunması üçün bütün səylərini əsirgəmirlər.
Görüşdə çıxış edən Azərbaycan Respublikası Milli Məclisinin sədr müavini Adil Əliyev də görüş iştirakçılarını Gənclər Günü münasibəti ilə təbrik edib, onlara xoş arzularını çatdırdı. O da çıxışında qeyd etdi ki, şəhid ailələri, Qarabağ müharibəsi əlilləri və onlara bərabər tutulan şəxslərin sosial məsələlərinin həlli daim diqqət mərkəzindədir. Dövlətimiz hər bir Azərbaycan vətəndaşının sosial məsələlərinin həllinə xüsusi diqqətlə yanaşır, bu baxımdan çox mühüm layihələr həyata keçirilir.
Səmimi keçən görüş zamanı “Vətən Müharibəsi Qəhrəmanı” şəhid polkovnik Nudirəliyev Zaurun övladları və Vətən müharibəsinin qaziləri dövlətimiz tərəfindən şəhid ailələrinə, qazilərə və müharibə iştirakçılarına göstərilən dəstək, diqqət və qayğıya görə Müzəffər Ali Baş Komandan cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya minnətdarlıqlarını ifadə edərək, bundan sonra da torpaqlarımızın müdafiəsi naminə Ali Baş Komandanın ətrafında sıx birləşəcəklərini bildiriblər.

Müharibə başlayan ilk günlərdən bəri Azərbaycan xalqının yüzlərlə igid oğlu könüllü olaraq ordu sıralarına qoşulmuş, Vətən torpaqları uğrunda vuruşmuşlar. Azərbaycan Respublikasının Prezidenti, Müzəffər Ali Baş Komandan cənab İlham Əliyevin uğurlu rəhbərliyi ilə Şanlı Ordumuzun sıralarında erməni təcavüzünə layiqli cavab verən Zəfər yürüşündə iştirak edərək, tarixi torpaqlarımızı işğaldan azad edənlərdən biri də Nərimanov rayonundan könüllü olaraq Vətən Müharibəsində iştirak etmiş şəhid Murad İlham oğlu Məmmədov olmuşdur. 2 fevral 2021-ci il tarixdə Gənclər Günü münasibəti ilə Nərimanov Rayon İcra Hakimiyyətinin, Rayon Gənclər və İdman İdarəsinin əməkdaşları, gənc qazilər və könüllülər Vətən müharibəsi şəhidi, idmançı Murad Məmmədovun evində olmuş, ailəsini ziyarət etmişlər. Ziyarət zamanı “Vətən uğrunda” medalı ilə təltif olunmuş Murad Məmmədovun əziz xatirəsi yad olunmuş, qəhrəman şəhidimizin döyüşlərdə göstərdiyi igidlik və şücaət yüksək qiymətləndirilmişdir. Şəhidin atası İlham Məmmədov oğlunun idman nailiyyətlərindən, keçdiyi hərbi xidmət yolundan danışmışdır. Ziyarətə gələnlər Vətən uğrunda canlarını fəda edən bütün şəhidlərimizin, o cümlədən Murad Məmmədovun xatirəsinin əziz tutulduğunu, hər zaman qəlblərində əbədi yaşayacağını qeyd etmişlər. Sonra Rayon İcra Hakimiyyətinin, Gənclər və İdman İdarəsinin nümayəndələri, gənc fəallar, qazilər və könüllülər şəhid Murad Məmmədovun məzarını ziyarət edərək, əziz xatirəsini hörmət və ehtiramla yad etmişlər.

Torpaqlarımızın işğaldan azad edilməsində, tarixi qələbənin qazanılmasında şücaət və qəhrəmanlıq göstərərək canını Vətən yolunda qurban verən igidlərimizdən biri də şəhid Bəkirli Azad Rasim oğludur. Vətən uğrunda canından keçən şəhidimiz Azad Bəkirlinin dəfn olunmasının 40-cı günü 2 fevral - Gənclər Gününə təsadüf etmişdir. Azərbaycan Respublikası Milli Məclisinin sədr müavini Adil Əliyev, Nərimanov Rayon İcra Hakimiyyətinin başçısı Abdin Fərzəliyev, Nərimanov rayonundan olan digər şəhid valideynləri, rayonun fəal gəncləri və könüllülər bu gün şəhid Azad Bəkirlinin məzarını ziyarət etmiş, daha sonra ailəsinə baş çəkmişdir. Ziyarət zamanı şəhidin ailəsinə başsağlığı verərək bu cür qəhrəman övlad yetişdirdikləri üçün ailəsinə minnətdarlıqlarını bildirmiş, hər zaman bütün şəhid ailələri kimi onların da daima yanlarında olduqlarını bildirmişlər.
NƏRİMANOV RAYONUNDA 2 FEVRAL - GƏNCLƏR GÜNÜ  ŞƏHİD AİLƏLƏRİNİN VƏ QAZİLƏRİN ƏHATƏSİNDƏ QEYD OLUNMUŞDUR


XalqXeber.Az

Materiallardan istifadə edərkən sayta mütləq istinad olunmalıdır. Bütün hüquqlar qorunur.