Təhsil Nazirliyi koronavirusun geniş yayıldığı bu günlərdə valideynləri və şagirdləri sıxlıq yaranan qapalı məkanlara niyə göndərirlər?..
Təhsil eksperti: “Təhsil Nazirliyi məsələnin daha asan yolla həll olunacağını düşünürdü”.
“Əslində düşünmürəm ki, pandemiya zamanı yeni nəsil şəxsiyyət vəsiqələrinə ehtiyac yaransın”.
Bu sözləri təhsil eksperti Elçin Əfəndi 9-cu sinifin onlayn imtahanları üçün şagirdlərdən mütləq yeni nəsil şəxsiyyəti vəsiqəsinin tələbini PİA.az-a şərh edərkən qeyd edib.
Təhsil Nazirliyi məktəblərə tapşırıb ki, 9-cu sinifin onlayn imtahanları üçün şagirdlər mütləq yeni nəsil şəxsiyyəti ilə qeydiyyatdan keçməlidir, çünki orada şəkil var.
Təhsil Nazirliyi koronavirusun geniş yayıldığı bu günlərdə valideynləri və şagirdləri sıxlıq yaranan qapalı məkanlara niyə göndərirlər? Şəxsiyyətdə şəkil məsələsini həll etməyin başqa yolu yoxdur və yaxud da indiki vaxtda şəkil bu qədər vacibdir? Nazirlik nəyin prinsipini aparır?
Mövzunu PİA.az-ın əməkdaşı təhsil eksperti Elçin Əfəndi ilə müzakirə edib.
Elçin Əfəndi: “Bəli, Təhsil Nazirliyinin 9-cu sinifin onlayn imtahanları üçün şagirdlərin mütləq yeni nəsil şəxsiyyəti ilə qeydiyyatdan keçməsi qərarı var. Amma pandemiya ilə əlaqədar olaraq ola bilsin ki, Təhsil Nazirliyi bununla bağlı qərarı ləğv etsin”.
Şagirdlərin yeni nəsil şəxsiyyət vəsiqəsi üçün “Asan Xidmət”ə getməli olduqlarını xatırladan ekspert PİA.az-a açıqlamasında bildirib ki, bu qərar indiki vəziyyət üçün ciddi təhlükə yaradır:
“Bəli, Təhsil Nazirliyinin 9-cu sinifin onlayn imtahanları üçün şagirdlərin mütləq yeni nəsil şəxsiyyəti ilə qeydiyyatdan keçməsi qərarı var. Amma pandemiya ilə əlaqədar olaraq ola bilsin ki, Təhsil Nazirliyi bununla bağlı qərarı ləğv etsin. Artıq bu barədə Nazirlikdə müzakirələr aparılır.
Əslində düşünmürəm ki, pandemiya zamanı yeni nəsil şəxsiyyət vəsiqələrinə ehtiyac yaransın. Ən azından bütün məktəblərdə şagirdlərin şəkilləri var və ondan istifadə etmək olar. Həmçinin də şəkilsiz olsa belə, hər bir şagirdin şəxsiyyət vəsiqəsi var.
Ola bilsin ki, Təhsil Nazirliyi məsələnin daha asan yolla həll olunacağını düşünürdü. Amma şagirdlər yeni nəsil şəxsiyyət vəsiqəsi üçün “Asan Xidmət”ə getməlidirlər. Bu da indiki vəziyyətdə ciddi təhlükə yaradır və alınan iş deyil”.
