SON DƏQİQƏ
XalqXeber.Az » Sosial » İcra şöbəsindən məhkəmə qərarına hörmətsizlik - NARAZILIQ!

İcra şöbəsindən məhkəmə qərarına hörmətsizlik - NARAZILIQ!

Tarix:

24-12-2020, 12:31

/ 839 dəfə oxundu.
İcra şöbəsindən məhkəmə qərarına hörmətsizlik - NARAZILIQ!

Bugünlərdə redaksiyamızın elektron ünvanına Məhdud Məsuliyyətli “Firavan” Kredit İttifaqının İdarə Heyətinin sədri Faiq Nəcəfov tərəfindən şikayət məktubu daxil olub. Qeyd edək ki, həmin müraciətin bir nüsxəsi ədliyyə naziri Fikrət Məmmədova ünvanlanıb.

Beləliklə, şikayət ərizəsində deyilir ki, Salyan Rayon Məhkəməsinin 2(057)-160 6/2016 saylı 5 iyul 2016-cı il tarixli icra vərəqəsinə əsasən, cavabdeh Ələsgər Əvəzağa oğlu Mehdiyev tərəfindən “Firavan” Kredit İttifaqına 20 min manat vəsaitin ödənilməsi bu günədək icra edilməyib: “2017-ci ildə Ədliyyə Nazirliyinin “qaynar xətt”inə bir neçə dəfə bu barədə şikayət etmişəm. Təəssüf ki, qanunlara zidd olaraq, şikayətimi şikayətçi olduğum şəxslərə yönəldərək, guya hesabıma vəsaitin ödənildiyini mənə cavab olaraq bildirmişlər. O zaman Ədliyyə Nazirliyi İcra Baş İdarəsinin rəhbəri olan Nurəddin Mustafayevin qəbulunda iki dəfə olmuşam. Nurəddin Mustafayev günahkar şəxslər barəsində ciddi tədbir görəcəyini vəd etsə də, nəticəsi olmamışdır”.

“Gülməli isə odur ki, gah yazırlar hesabıma pul köçürdüblər, gah da yazırlar ki, hesab təqdim etməmişəm”

Bütün müraciətlərinin Salyan Rayon İcra və Probasiya şöbəsinin rəisi Ağahüseyn Qulam oğlu Fərzəliyevlə əlbir olan Şirvan Regional Ədliyyə İdarəsinin rəisi, bələdiyyələrin qənimi kimi ad qazanan Nizami Əli oğlu Hüseynova yönəldildiyini vurğulayan Faiq Nəcəfovun sözlərinə görə, bu dəfə də ona şablon cavab verilib: “Şablon cümlələrlə cavablar göndərərək, guya hesabıma 243 manat ödənildiyi və borclunun 500 manat cərimələndiyini bildirmişlər. Gülməli isə odur ki, gah yazırlar hesabıma pul köçürdüblər, gah da yazırlar ki, hesab təqdim etməmişəm. Hesabıma pul daxil olmadığından Nurəddin Mustafayevə yenidən müraciətim onun heç xoşuna gəlməsə də o, günahkar şəxslərin cəzalandırılacağına, borclunun əmək haqqından hər ay 50 faiz tutularaq hesabıma köçürüləcəyini vəd versə də, mənə aydın oldu ki, neçə ki, bu üçlük təşkil edən oliqarxların əlləri birgə bala batıb nəticə olmayacaq. Və mən nə zamansa ədalətin bərpa olunacağına inanaraq, üçlüyün layiqli cavablarını alacağı günü gözlədim. Bu ilin dekabr ayında Nurəddin Mustafayevin vəzifəsindən azad edildiyini öyrənib, nəhayət, ədalətin bərpa olunduğuna inanaraq yenidən Salyan rayon icra bölməsinə 02.11.2020-ci il tarixili 04 saylı məktubla müraciət etdim. Borcludan 8 min manat tutulduğunu, aylıq tutulmanı istədikləri kimi, yəni istədikləri aylar saxladıqlarını, 50 faizdən 25 faizə saldıqları barədə məlumat əldə etdiyimdən, məktuba hesabı bir daha əlavə edərək, vəsaiti hesabıma köçürməklərini və aylıq tutulmalarla bağlı müraciət etdim. Vətəndaşların müraciətlərinə baxılması və kargüzarlıq haqqında qaydaları kobud şəkildə pozan “məmur”lar yenidən öz ampluasında olduğundan İcra Baş İdarəsinə müraciət etdim. Komutatora (0124 4047171) cavab verən xanım rəhbərliyin vaxtı olmadığını bildirib, rayonun kuratoru olan Günel Hacıyeva ilə əlaqə yaratdı. Xanım Hacıyeva şikayəti dinləyib, rayonla əlaqə saxladıqdan sonra rayona müraciət etmədiyimi bildirdi. Mən isə Hacıyevadan elektron poçtunu öyrənib ona məktubu və hesabı qəbul etdiklərini imzaları ilə təsdiqlədiklərini göndərdim”.

Faiq Nəcəfov ədliyyə naziri Fikrət Məmmədova müraciət edərək, məsələnin araşdırılıb günahkar şəxslərin qanun qarşısında cavab vermələri üçün müvafiq tədbirlərin görülməsini xahiş edir

Bundan sonra Günel Hacıyevanın həftənin sonunadək ödəniş olmasa, yenidən ona müraciət etməyi məsləhət gördüyünü qeyd edən “Firavan” Kredit İttifaqının İdarə Heyətinin sədri bildirib ki, növbəti həftə ödəniş olmadığından yenidən müraciət etmək məcburiyyətində qalıb: “Hacıyeva maliyyə idarəsinin problem yaratdığını bildirdikdə rayon maliyyə idarəsi ilə əlaqə saxladım. İcraçı Vüqara sənədləri maliyyəyə göndərmədiyini dedikdə növbəti gün göndərəcəyini bildirsə də, sonradan telefon zənglərimə cavab vermədi. Beləliklə də o, bu günədək maliyyə idarəsinə ödəniş üçün sənədləri təqdim etməyərək, Baş İdarəni də aldatmasından bezərək, ədliyyə nazirinə müraciət etməli oldum”. Bu cür məmurların, vəzifə sahiblərinin vətəndaşları dövlətdən narazı saldıqlarını deyən Faiq Nəcəfov bir daha qəzetimiz vasitəsiylə ədliyyə naziri Fikrət Məmmədova müraciət edərək, məsələnin araşdırılıb günahkar şəxslərin qanun qarşısında cavab vermələri üçün müvafiq tədbirlərin görülməsini xahiş edir.

“Əlimizdə heç bir əsas olmadan müəssisəyə çatacaq pulu ona versək, sabah boğazımızdan yapışıb deyəcəklər ki, siz nə əsasla məhkəmə qərarını pozubsunuz, vəzifə səlahiyyətini aşıbsınız”

Biz isə “Hürriyyət” olaraq öz növbəmizdə, “Firavan” Kredit İttifaqının İdarə Heyətinin sədrinin müraciətində adıçəkilən Salyan Rayon İcra və Probasiya şöbəsinin rəisi Ağahüseyn Fərzəliyevlə əlaqə saxlayıb, ona bir neçə sual ünvanlamaqla məsələyə aydınlıq gətirməyə çalışdıq. İlk öncə onu qeyd edək ki, nə qədər qəribə olsa da, Ağahüseyn Fərzəliyev “Hürriyyət”ə açıqlamasında Faiq Nəcəfovun “Firavan” Kredit İttifaqının İdarə Heyətinin sədri olmadığını bildirdi: “O, İdarə Heyətinin sədri deyil, gərək düz müraciət etsin. Məhkəmə qərarı var və orada tələbkar Faiq Nəcəfov yox, “Firavan” Məhdud Məsuliyyətli Cəmiyyətdir. Faiq Nəcəfov deyir ki, mən oranın üzvüyəm. Üzv olmaq o demək deyil ki, müəssisəyə çatacaq pul ona verilməlidir. Ona deyildi ki, get məhkəmədən əlavə qərar al ki, pul sənə verilsin. Hazırda 10 minə yaxın pul yığılıb depozitdə qalıb. Müəssisənin isə hesabı bağlanıb, yoxdur. Biz müəssisənin pulunu başqa şəxsə verə bilmərik. Bundan başqa, o, sədr belə olsa, burda tələbkar hüquqi şəxs – müəssisədir. Məhkəmə də qərar verib ki, pul alınıb hüquqi şəxsə verilsin. Sədr isə istənilən şəxs ola bilər. Buna görə də əlimizdə heç bir əsas olmadan müəssisəyə çatacaq pulu ona versək, sabah boğazımızdan yapışıb deyəcəklər ki, siz nə əsasla məhkəmə qərarını pozubsunuz, vəzifə səlahiyyətini aşıbsınız”.

“04/11-10471 saylı 21.06.2017-cı il tarixli məktubla İcra Baş İdarəsinin rəisi Nurəddin Mustafayevin imzası ilə İttifaqın şikayətinə cavab olaraq bildirilib ki, borclunun pensiyasından hər ay 50 faiz tutulması üçün borcunun iş yerinə müraciət olunub. Bəs nə üçün və nə zaman aylıq tutulmanı 50 faizdən 25 faizə endirmisiniz?” sualını cavablandıran Ağahüseyn Fərzəliyev bunu Salyan Rayon İcra və Probasiya şöbəsinin müəyyən etdiyini dedi: “Onu biz müəyyən edirik, araşdırırıq ki, bunu neçə faiz etmək olar. Pandemiya dövrünü, həmin şəxsin ürək xəstəsi olmasını, dərmanla yaşamasını nəzərə alıb, 25 faiz deyil, 30 faiz müəyyən etmişik. Biz hər şeyi qanun daxilində etmişik. Bizim burda nə marağımız var?! Biri pul alıb, digəri isə pul verib. Burda bizlik nə var?!”

Ağahüseyn Fərzəliyev “İddia edilir ki, tələbkarın vəkilinə və səlahiyyətli nümayəndələrinə işlə tanış olmağa şərait yaratmırsınız. Bu, doğrudur?” sualını cavablandırarkən, bunun həqiqətə uyğun olmadığını qeyd etdi: “Belə bir şey yox. Lap özü gəlsin, nə sənəd istəyirsə çıxarıb “kopya”sını verək. Vəkili, özü, kim istəyirsə gəlsin, bütün sənədlərin surətini verək. Qanun buna icazə verir. Sadəcə olaraq, onun tələbi əsassızdır. Dəfələrlə nazirliyə, baş idarəyə gedib və biz onlara demişik ki vəziyyət belədir. Deyiblər ki, siz düz edirsiniz, çünki o, tələbkar deyil. Ona başa saldıq ki, məhkəməyə gedib əlavə qərar al ki, müəssisənin hesabı ləğv olunub, onun yiyəsi mənəm, qərar verin ki, həmin pul mənə verilsin. Sonra həmin qərarı gətirib versin, biz də pulu onun hesabına köçürək”.

Salyan Rayon İcra və Probasiya şöbəsinin rəisi Ağahüseyn Fərzəliyevə və Ədliyyə Nazirliyi İcra Baş İdarəsinin rəisi İlqar Cəfərova müraciətin də heç bir nəticəsi olmayıb

Bu arada, 02.11.2020-ci il tarixdə Salyan Rayon İcra və Probasiya şöbəsinin rəisi Ağahüseyn Fərzəliyevə və Ədliyyə Nazirliyi İcra Baş İdarəsinin rəisi İlqar Cəfərova rəsmi qaydada müraciət etdiyini vurğulayan “Firavan” Kredit İttifaqının İdarə Heyətinin sədri Faiq Nəcəfov isə Salyan Rayon İcra və Probasiya şöbəsinə iki dəfə vəkil göndərdiyini, lakin onlara işlə tanış olmağa imkan verilmədiyini bildirdi: “Həmin məktubda deyilir ki, Salyan Rayon Məhkəməsinin 2(057)-160 6/2016 saylı 5 iyul 2016-cı il tarixli qərarı Salyan Rayon İcra və Probasiya şöbəsi tərəfindən icra edilməyib. İcra şöbəsində olan vəkilimizə də sənədlərlə tanış olmağa imkan verilməyib. Bu isə “İcra haqqında” Qanunun 29-cu maddəsinin kobud surətdə pozulmasıdır. Belə ki, Qanunun 29-cu maddəsinə əsasən bizim icraat materialları ilə tanış olmaq, onlardan çıxarışlar etmək, vəsatət vermək, icra hərəkətlərinin həyata keçirilməsində iştirak etmək, bu zaman şifahi və yazılı izahatlar vermək, icraatın gedişində meydana çıxan bütün məsələlər üzrə öz dəlil və mülahizələrimizi bildirmək, icrada iştirak edən şəxslərin vəsatətlərinə, dəlil və mülahizələrinə etiraz etmək, icra məmuruna etiraz etmək və onun hərəkətlərindən şikayət etmək hüququmuz var. Odur ki, 02.11.2020-ci il tarixdə ünvanlanan məktubda Salyan Rayon İcra və Probasiya şöbəsinin rəisi Ağahüseyn Fərzəliyev və Ədliyyə Nazirliyi İcra Baş İdarəsinin rəisi İlqar Cəfərovdan, Salyan şəhər sakini, cavabdeh Ələsgər Əvəzağa oğlu Mehdiyevdən Məhdud Məsuliyyətli “Firavan” Kredit İttifaqının iddiası əsasında, məhkəmə qərarı ilə tutulmuş vəsaitlərin məbləği haqqında aylar üzrə məlumatların verilməsini, eyni zamanda tutulmuş vəsaitlərin məktubda əlavə olunmuş hesablaşma hesabına köçürülməsini xahiş etmişəm. Lakin bunun heç bir nəticəsi olmayıb”.

“Fəaliyyəti dayandırılmış müəssisə, şirkət və ya MMC-nin isə bütün əmlakı onun qanuni təmsilçisinə aiddir”

Məsələ ilə bağlı dəfələrlə Ağahüseyn Fərzəliyevlə danışdığını deyən Faiq Nəcəfovun sözlərinə görə, bu zaman müxtəlif bəhanələrlə rastlaşıb: “Vəlikdən başqa, “Firavan” Kredit İttifaqının rayondakı nümayəndəsini də Salyan Rayon İcra və Probasiya şöbəsinə göndərmişəm, lakin ona da işlə tanış olmağa imkan verilməyib. Hər dəfə müxtəlif bəhanələrlə qarşılammışıq. Gah deyiblər ki, icraçı burda yoxdur, gah deyirlər xəstədir, işə çıxmır və s. Burdan rayona gedən vəkil orda günlərlə, həftələrlə gözləyə bilməz, axı. Əgər icraçı yoxdursa, sonra rəsmi məktubla göndərsin, sorğulara cavab versin. Bir qədər öncə qeyd etdiyim kimi, 02.11.2020-ci il tarixdə Salyan Rayon İcra və Probasiya şöbəsinin rəisi Ağahüseyn Fərzəliyevə və Ədliyyə Nazirliyi İcra Baş İdarəsinin rəisi İlqar Cəfərova məktubla müraciət etmişəm. “Kargüzarlıq haqqında” Qanuna və digər qanunvericiliyə əsasən, məktub, ərizə və şikayətlərə baxılma müddəti maksimum bir aydır. Lakin qeyd etdiyim məktubun göndərilməsindən artıq 1 ay 22 gün keçir. Buna baxmayaraq, hələ də məktuba, bizim rəsmi sorğumuza cavab vermirlər. Bu isə artıq işlə tanış olmamağa şərait yaratmamaqdır. Hesabla bağlı məsələyə gəlincə, indiyə qədər bu problemi demirdilər. Bir qədər əvvəl də bildirdiyim kimi, bununla bağlı Ədliyyə Nazirliyinin kuratoru Günel Hacıyeva ilə danışmışam. O dedi ki, siz “Firavan” Kredit İttifaqında qanuni təmsilçi olduğunuzu təsdiqləyən reyestri göndərin və biz də onun əsasında ödənişi təmin edəcəyik. Lakin bundan sonra “bu gün ödəyəcəyik”, “tapşırmışam, həftənin axırına qədər ödəyəcəyik” və bu kimi digər bahənələrlə qarşılaşdım. Bundan sonra Salyan Rayon İcra və Probasiya şöbəsində Vüqar adlı icraçı ilə danışmışam. O deyib ki, reyestri göndər, mən onu Maliyyə İdarəsinə göndərim. Çünki Maliyyə İdarəsi deyir ki, onsuz pulu buraxa bilmərik. Maliyyə İdarəsinin müdiri Samir müəllimlə, onun müavini Şərif müəllimlə də danışmışam. Onlar deyiblər ki, heç bir problem yoxdur, əgər siz qanuni təmsilçisinizsə, pulu hesabınıza köçürə bilərik. Eyni sözü, Ədliyyə Nazirliyinin kuratoru da təsdiqləyib. Bundan başqa, onu da bildirim ki, 4 il öncə də Salyan Rayon İcra və Probasiya şöbəsinə şəxsi hesabımı vermişdim. Onlar isə rəsmi məktub yazıblar ki, hesabınıza 243 manat pul köçürtmüşük. Bu gün isə Ağahüseyn Fərzəliyev deyir ki, heç bir əsas olmadan müəssisəyə çatacaq pulu mənim hesabıma köçürə bilməzlər. Bu halda, nədən o zaman məktub göndərərək, hesabıma 243 manatın köçürüldüyünü bildirirdilər? Bu günə qədər məndə “Firavan” Kredit İttifaqının hesabını istəyən olmayıb. Qeyd etdiyim kimi, “Firavan” Kredit İttifaqının qanuni təmsilçisi mənəm. İttifaq qanuni olaraq fəaliyyətini dayandırıb və bunu rəsmi bəyan edib. Fəaliyyəti dayandırılmış müəssisə, şirkət və ya MMC-nin isə bütün əmlakı onun qanuni təmsilçisinə aiddir”.

Salyan Rayon İcra və Probasiya şöbəsi tərəfindən cavabdeh Ələsgər Mehdiyevin pensiyasından aylıq tutulmanın 50 faizdən 25 faizə endirilməsinə gəlincə, Faiq Nəcəfov bildirdi ki, adıçəkilən şəxsin kifayət qədər yaxşı imkanı var: “Həyat yoldaşının mülkü araşdırılmayıb. Odur ki, bu, əsas vermir ki, aylıq tutulma 50 faizdən 25 faizə salınsın. Bundan başqa, cavabdeh Ələsgər Mehdiyevi qəsdən 1 il ödəmədən yayındırıblar. Bu işlə bağlı o zaman İcra Baş İdarəsinin rəisinin qəbulunda olmuşam və o, inzibati iş qaldırılacağına dair vəd vermişdi. Guya onlar da şərti olaraq məhkəməyə verdilər, 500 manat da cərimə kəsdilər. Halbuki özləri danışıb, hər şeyi həll etmişdilər. Nə məhkəmə, nə də 500 manat cərimə oldu. Yəni bu cür oyunlarla məhkəmənin qərarının icrasını indiyə qədər yubadırlar”.

“Hürriyyət”in Araşdırma Qrupu

Şərhlər

XƏBƏR LENTİ