Yüz illər öncə Çar Rusiyasında ərə getmək istəyən qız, evlənmək istəyən oğlan mütləq kəndin "qlava”sından icazə almalı idi. Bu gün, yəni XXI əsrdə Qaçqınkom-un sədri Rövşən Rzayev özünü lap rus "qlava”sı kimi aparır. Deməli, problem belədir. Qaçqın, məcburi köçkün valideyn öz qızını ərə verəndə düşünməlidir ki, övladı və gələcək nəvələri qaçqın statusunu itirməsin. Bəli, beynəlxalq qanunlarla tənzimlənən qaçqın statusunu bizim geri zəkalılar oyuncağa döndərib. Deməli, məcburi köçkün, yaxud qaçqın qız qaçqın, ya da məcburi köçkün olmayan oğlana ərə gedirsə, özü və gələcək övladları avtomatik olaraq statusunu itirir, bütün güzəştlərdən məhrum olur. Təsəvvür edirsiniz vətəndaş özündən asılı olmayan səbəbdən, ( işğaldan və s ) yerindən-yurdundan çıxıb, hər şeyini, evini-eşiyini, təsərrüfatını və s itirib. Və ərə getməklə bu statusu itirir. Belə məntiqsiz, absurd qərar olar..? Deməli, məcburi köçkün, yaxud qaçqın ancaq və ancaq öz kateqoriyasında olan şəxsə ərə gedə bilər. Bu rüsvayçılıqdır. Dünyada buna bənzər bir hal yoxdur. Onda nəyə görə məcburi köçkün kişi başqası ilə evlənəndə öz statusunu saxlayır ? Bəlkə qaçqın və məcburi köçkünlər Qaçqınkomun sədri Rövşən Rzayevdən icazə almalıdırlar ? Bu cəfəng qərar qaçqın ailələrinin dağılmasına səbəb olur. Ailə yenidən qaçqın statusunu bərpa etmək üçün boşanmağa məcbur olur. Digər daha vacib bir problem. 30 ildir yataqxanada, yaxud hansısa bir yerdə özünə sığınacaq tapan qaçqın-köçkün güc-bəla ilə özünə bir kasıb daxma alıb özəlləşdirir. Və həmin andan qaçqın öz statusundan məhrum olur. Niyə ? Qaçqın və məcburi köçkünlər onsuz da yüz illik dədə-baba mülklərindən məhrum olublar dəə....indi bir daxma almaq nə boyda günahdir. Qaçqın və məcburi köçkünlərin mülkiyyət hüququ yoxdur ? Bu zavallıları 30 il öncə erməni daşnaklar mülkiyyətdən məhrum ediblər, indi də Qaçqınkom məhrum edir ? Axı, qaçqına verilən çörək pulu, kommunal xərclər daxmaya görə deyil, statusuna görə verilir. Görəsən Qaçqınkomun ikinci təhsili hüquq ( 1-ci tarixçi ) olan sədri Rövşən Rzayev bu barədə nə düşünür ? Cavab gözləyirik cənab Sədr! /GUNDELİK-BAKU
